راولپنڈی: اینٹی نارکوٹکس فورس (اے این ایف) نے راولپنڈی اور لاہور میں بڑی کارروائیاں کرتے ہوئے ڈرونز کے ذریعے منشیات اسمگل کرنے کی کوشش ناکام بنا دی۔
ترجمان اے این ایف کے مطابق بھیڈیاں کلاں روڈ، قصور کے قریب دو اسمگلرز کو گرفتار کیا گیا جن کی گاڑی سے 9 کلوگرام ہیروئن، ایک کواڈ کاپٹر ڈرون اور دیگر آلات برآمد ہوئے۔ منشیات گاڑی کے خفیہ خانوں اور ذاتی سامان میں چھپائی گئی تھی۔
ابتدائی تحقیقات میں لاہور کے علامہ اقبال ٹاؤن میں غیر قانونی ڈرون اسمبلی یونٹ کی نشاندہی ہوئی۔ کارروائی کے دوران جدید ڈرونز، ہیگزا کاپٹرز، کواڈ کاپٹرز، فکسڈ وِنگ ہائبرڈ وی ٹول اور ڈرون ریموٹس برآمد کیے گئے۔
اے این ایف حکام کے مطابق ڈرون کمپنی کے ہیڈ آف فنانس کو گرفتار کر لیا گیا جو بغیر قانونی اجازت کے ڈرونز کی اسمبلنگ اور مرمت میں ملوث تھا۔ یہ ڈرونز منشیات کو سرحد پار اسمگل کرنے کے لیے تیار کیے جا رہے تھے۔
ترجمان نے مزید کہا کہ منشیات اسمگلنگ میں جدید ٹیکنالوجی کا استعمال تشویشناک ہے، تاہم اے این ایف جدید حکمتِ عملی اور خفیہ معلومات کی بنیاد پر ایسے نیٹ ورکس کو ناکام بنا رہی ہے۔
