کراچی: شہرِ قائد میں فائرنگ کے دو مختلف واقعات میں دو افراد جاں بحق ہوگئے۔
پہلا واقعہ بلدیہ ٹاؤن کی نواب کالونی میں پیش آیا، جہاں مزاحمت پر ڈاکوؤں نے نوجوان افتخار کو گولی مار کر ہلاک کردیا۔ لواحقین کے مطابق مقتول موبائل مارکیٹ میں ملازم تھا اور پانچ بھائیوں میں سب سے چھوٹا تھا۔ وہ شادی کی تقریب میں شرکت کے لیے دکان سے جلدی نکلا تھا، راستے میں ڈاکوؤں نے روکنے کی کوشش کی، مگر افتخار کے بھاگنے پر ملزمان نے سر میں گولی ماردی جس سے وہ موقع پر ہی جاں بحق ہوگیا۔
واقعے کے بعد علاقے میں کشیدگی پھیل گئی اور شہریوں نے ملزمان کی گرفتاری کا مطالبہ کیا۔
دوسرا واقعہ یونیورسٹی روڈ پر پی ایس او پمپ کے قریب پیش آیا، جہاں نامعلوم ملزمان کی فائرنگ سے 20 سالہ عبداللہ جاں بحق ہوگیا۔ چھیپا کے مطابق مقتول کی لاش عباسی شہید اسپتال منتقل کردی گئی۔
