دبئی:معروف بھارتی ٹریول انفلوئنسر اور فوٹوگرافر انونے سود 32 سال کی عمر میں لاس ویگاس میں انتقال کر گئے۔
بھارتی میڈیا کے مطابق یہ افسوسناک خبر انونے سود کے اہلِ خانہ نے ان کے سرکاری انسٹاگرام اکاؤنٹ پر ایک بیان کے ذریعے شیئر کی۔ بیان میں گہرے دکھ کا اظہار کرتے ہوئے اہلِ خانہ نے مداحوں سے اس مشکل وقت میں رازداری (پرائیویسی) کا احترام کرنے کی اپیل کی۔ تاہم، موت کی وجہ ظاہر نہیں کی گئی۔
انونے سود دبئی میں مقیم تھے اور اپنی خوبصورت ٹریول فوٹوگرافی، ڈرون شاٹس اور متاثرکن ویڈیو اسٹوری ٹیلنگ کے باعث دنیا بھر میں مقبولیت حاصل کر چکے تھے۔ ان کے انسٹاگرام پر 14 لاکھ سے زائد فالوورز اور یوٹیوب پر 3 لاکھ 80 ہزار سے زیادہ سبسکرائبرز تھے۔
انہیں مسلسل تین سال فوربز انڈیا کی ’’ٹاپ 100 ڈیجیٹل اسٹارز‘‘ کی فہرست میں بھی شامل کیا گیا تھا۔
دنیا بھر سے مداحوں نے ان کے اچانک انتقال پر گہرے رنج و غم کا اظہار کیا اور انہیں ایک باصلاحیت اور پُرجوش فنکار کے طور پر یاد کیا۔
