اسلام آباد: اسپیشل اولمپکس ورلڈ ونٹر گیمز اٹلی 2025 میں شاندار کارکردگی دکھانے والے پاکستانی کھلاڑیوں کے اعزاز میں اسلام آباد کے ایک مقامی ہوٹل میں پروقار تقریب کا انعقاد کیا گیا۔
تقریب کی مہمانِ خصوصی اسپیشل اولمپکس پاکستان کی چیئرپرسن روناک لاکھانی تھیں۔
تفصیلات کے مطابق مارچ 2025 میں اٹلی میں منعقد ہونے والے ونٹر گیمز میں خصوصی کھلاڑیوں نے بہترین کھیل پیش کیا اور مجموعی طور پر 15 تمغے اپنے نام کیے۔
کھلاڑیوں کی حوصلہ افزائی کے لیے پاکستان اسپورٹس بورڈ اور اسپیشل اولمپکس کی جانب سے نقد انعامات بھی تقسیم کیے گئے۔ پاکستان کے کھلاڑی شاہ گلون، علی رضا، منیب الرحمان، جبکہ کوآرڈینیٹرز سادیا بیگ اور آمنہ اشرف کے علاوہ کوچز شمیلہ ارم، محمد سلیم اور اسلام آباد ریجن کے کوچ راجہ فیصل اشرف بھی موجود تھے۔
او جی سی ایل کی سمبل وہاب عثمان بھی تقریب میں شریک تھیں۔
چیئرپرسن روناک لاکھانی نے اپنے خطاب میں کہا کہ اسپیشل اولمپینز پاکستان کا فخر ہیں۔
ان کا کہنا تھا کہ وفاقی اور سندھ حکومتوں نے ان کھلاڑیوں کی حوصلہ افزائی کی ہے، اور اگر سرکاری تعاون اسی طرح جاری رہا تو یہ کھلاڑی مزید میڈلز جیت کر ملک کا نام روشن کریں گے۔ انہوں نے خصوصی ایتھلیٹس کو “قوم کا قیمتی سرمایہ” قرار دیا۔
اس موقع پر اداکارہ سرورت گیلانی، جو اسپیشل اولمپکس کی برانڈ ایمبیسیڈر ہیں، بھی موجود تھیں۔
کوچ شمیلہ ارم نے کہا کہ ادارہ کھلاڑیوں کو بہترین سہولتیں فراہم کر رہا ہے۔
انہوں نے مزید کہا: “مجھے فخر ہے کہ میں پاکستان کے ان باصلاحیت خصوصی کھلاڑیوں کو تربیت فراہم کر رہی ہوں۔ یہ نوجوان ہمارے ملک کی اصل پہچان ہیں۔”
