گوہاٹی میں کھیلے گئے دوسرے ٹیسٹ میں جنوبی افریقا نے بھارت کو تاریخی شکست دے کر 25 سال بعد بھارتی سرزمین پر سیریز اپنے نام کر لی۔ ورلڈ ٹیسٹ چیمپئن جنوبی افریقا نے پانچویں دن بھارت کو 549 رنز کے مشکل ہدف کے تعاقب میں صرف 140 پر ڈھیر کر دیا، یوں مہمان ٹیم نے میچ 408 رنز سے جیت کر دو میچوں کی سیریز 0-2 سے کلین سوئپ کر لی۔ یہ بھارت کی ہوم گراؤنڈ پر رنز کے حساب سے تاریخ کی سب سے بڑی شکست ہے اور گزشتہ سات ہوم ٹیسٹ میں ان کی پانچویں ناکامی بھی۔
میچ کے ہیرو اسپنر سائمن ہارمر رہے جنہوں نے چھ وکٹیں حاصل کر کے بھارتی بیٹنگ لائن تباہ کر دی۔ 36 سالہ ہارمر کی 37 رنز کے عوض چھ شکار نے جنوبی افریقا کو وہ کارنامہ دلایا جو آخری بار سال 2000 میں ہینسی کرونی کی قیادت میں ہو پایا تھا۔ بھارت کی جانب سے صرف رویندرا جڈیجا ہی مزاحمت کر سکے جنہوں نے 54 رنز بنائے، لیکن کیشو مہاراج نے انہیں اسٹمپڈ کروا کر بھارتی امیدوں کا چراغ بجھا دیا، جبکہ آخری وکٹ محمد سراج کی گری جنہیں یانسن کے شاندار کیچ نے پویلین بھیجا۔
اس سے پہلے کولکتہ ٹیسٹ بھی بھارت نے تین دن میں ہار دیا تھا، اور اب گوہاٹی میں بھی اپنے ہی ہوم کنڈیشنز میں اسپن کے مقابلے میں جنوبی افریقا نے انہیں مات دے دی۔ مہمان ٹیم نے چوتھے روز 260-5 پر اننگز ڈکلیئر کر کے بھارت کو ریکارڈ ہدف دیا، لیکن بھارتی بیٹنگ کہیں بھی مقابلہ کرتی دکھائی نہ دی۔ سوریا سدرشن کو یانسن نے شروع میں آؤٹ کیا، مگر نوبال کے باعث وہ بچ گئے، تاہم قسمت بھی بھارت کا ساتھ نہ دے سکی اور بڑے ہدف کے دباؤ نے پوری ٹیم کو ڈھیر کر دیا۔
