پشاور: خیبر پختونخوا پولیس کی جانب سے جاری سالانہ رپورٹ میں انکشاف کیا گیا ہے کہ رواں سال صوبے بھر میں مختلف کارروائیوں کے دوران مجموعی طور پر 955 دہشت گرد ہلاک کیے گئے۔
سینٹرل پولیس آفس کے مطابق پولیس اور کاؤنٹر ٹیررازم ڈیپارٹمنٹ نے مشترکہ آپریشنز میں 423 دہشت گردوں کو مار گرایا، جبکہ 532 دہشت گردوں کو سکیورٹی فورسز نے مختلف کارروائیوں کے دوران ہلاک کیا۔
رپورٹ میں بتایا گیا ہے کہ کارروائیوں کے دوران دہشت گردوں کے قبضے سے بھاری مقدار میں اسلحہ اور گولہ بارود بھی برآمد ہوا۔
سینٹرل پولیس آفس کے مطابق ہلاک دہشت گردوں میں 33 اہم کمانڈرز بھی شامل تھے، جن کا تعلق وزیرستان، بنوں، ڈیرہ اسماعیل خان، مردان، کوہاٹ سمیت متعدد اضلاع سے تھا۔
اعداد و شمار کے مطابق سب سے زیادہ دہشت گرد بنوں، ڈی آئی خان، شمالی و جنوبی وزیرستان اور خیبر میں مارے گئے، جبکہ کرم، اورکزئی اور ملاکنڈ میں بھی کارروائیوں کے دوران اہم شدت پسندوں کا خاتمہ کیا گیا۔
