راولپنڈی کے تھانہ صدر بیرونی کی حدود میں ثمر زار کالونی میں پیٹرول پمپ کے مالک کو فائرنگ کرکے قتل کرنے کا واقعہ پیش آیا، جسے پولیس نے ٹارگٹ کلنگ قرار دیا ہے۔
پولیس کے مطابق مقتول کے بھائی اعجاز الحق کی مدعیت میں قتل اور اعانتِ جرم کی دفعات کے تحت مقدمہ درج کرلیا گیا ہے۔ مقتول سردار ارشاد معروف کاروباری شخصیت اور چکری روڈ پر قائم پیٹرول پمپ کے مالک تھے۔
مدعی کے مطابق وہ اپنے بھائی اور بھتیجے کے ہمراہ چوہدری اشرف روڈ پر سردار ارشاد کے منتظر تھے۔ سردار ارشاد نے انہیں اپنی ویگو گاڑی پر پیٹرول پمپ لے جانا تھا۔ جیسے ہی ان کی گاڑی گلی کے قریب پہنچی، اسی دوران ایک موٹرسائیکل پر سوار دو ملزمان گاڑی کے برابر آئے اور عقب میں بیٹھے شخص نے قریب سے فائرنگ کردی۔
گولیاں سردار ارشاد کے سینے اور جسم کے دیگر حصوں میں لگیں۔ ملزمان فائرنگ کے بعد فرار ہوگئے، جبکہ زخمی کو اسپتال منتقل کیا گیا جہاں وہ زخموں کی تاب نہ لاتے ہوئے چل بسے۔
مدعی نے مؤقف اپنایا کہ نامعلوم افراد نے منصوبہ بندی کے تحت بھائی کو قتل کیا، تاہم اس کی وجوہات تاحال سامنے نہیں آئیں۔ پولیس نے مقدمہ درج کرکے تحقیقات شروع کردی ہیں۔
ذرائع کے مطابق فائرنگ کے وقت سردار ارشاد اپنی تین بیٹیوں کو اسکول سے لے کر واپس آرہے تھے، تاہم یہ بات ایف آئی آر میں شامل نہیں کی گئی۔
