قومی ڈیوٹی کے باعث پاکستانی کرکٹرز بنگلادیش پریمیئر لیگ (بی پی ایل) کا پورا سیزن نہیں کھیل پائیں گے۔
ذرائع کے مطابق بی پی ایل میں منتخب زیادہ تر کھلاڑی قومی ٹی ٹوئنٹی اسکواڈ کا حصہ ہیں، اسی وجہ سے ان کا لیگ میں مکمل طور پر دستیاب ہونا مشکل دکھائی دیتا ہے۔
اطلاعات کے مطابق مستقل ٹی ٹوئنٹی اسکواڈ میں شامل بعض کھلاڑیوں کو این او سی نہ دینے کا بھی امکان موجود ہے، تاہم این او سی جاری کرنے کا فیصلہ ہر کھلاڑی کے کیس کے مطابق کیا جائے گا۔ پی سی بی نے ابھی تک بی پی ایل کے لیے این او سی دینے سے باضابطہ انکار نہیں کیا۔
بی پی ایل 26 دسمبر سے 23 جنوری تک جاری رہے گی، جبکہ انہی تاریخوں میں پاکستان کی سری لنکا کے خلاف ٹی ٹوئنٹی سیریز شیڈول ہے۔ اس کے علاوہ آسٹریلیا کے خلاف ہوم سیریز بھی جنوری کے اختتام پر کھیلی جائے گی۔
ذرائع کا کہنا ہے کہ پاکستانی کرکٹرز کی دستیابی کی صورت حال سے بی پی ایل کی فرنچائزز آگاہ ہیں اور وہ متبادل کھلاڑیوں کا انتخاب کر سکتی ہیں۔
بی پی ایل کے لیے منتخب پاکستانی کھلاڑیوں میں صائم ایوب، خواجہ نافع، صفیان مقیم، صاحبزادہ فرحان اور محمد نواز شامل ہیں۔ اس کے علاوہ جہانداد خان، احسان اللّٰہ، حیدر علی، عثمان خان، ابرار احمد اور محمد عامر بھی ڈرافٹ میں منتخب ہوئے تھے۔
واضح رہے کہ صائم ایوب، صاحبزادہ فرحان، محمد نواز، عثمان خان اور ابرار احمد قومی ٹی ٹوئنٹی اسکواڈ کے مستقل رکن ہیں۔
