اسلام آباد: ایف آئی اے امیگریشن نے اسلام آباد انٹرنیشنل ایئرپورٹ پر کارروائی کرتے ہوئے بھائی کے پاسپورٹ پر یورپ جانے کی کوشش کرنے والے مسافر کو آف لوڈ کر دیا۔
ترجمان ایف آئی اے کے مطابق مسافر کی شناخت محمد ارسلان کے نام سے ہوئی، جو ترک ایئرلائن کی پرواز TK-751 کے ذریعے اٹلی روانہ ہونے کی کوشش کر رہا تھا۔ امیگریشن کلیئرنس کے دوران مسافر کے سفری دستاویزات مشکوک پائے گئے۔
مزید جانچ پڑتال پر معلوم ہوا کہ مسافر نے سفر کے لیے اپنے بھائی محمد عمران کا پاسپورٹ اور ریذیڈنٹ کارڈ پیش کیا تھا۔ مسافر کو بعد ازاں مزید قانونی کارروائی اور سہولت کار کی نشاندہی کے لیے اینٹی ہیومن ٹریفکنگ سرکل اسلام آباد منتقل کر دیا گیا ہے۔
ایف آئی اے نے شہریوں کو ہدایت کی ہے کہ بیرونِ ملک سفر کے لیے ہمیشہ قانونی طریقہ اختیار کریں اور اپنی ذاتی دستاویزات، بشمول پاسپورٹ، کسی غیر متعلقہ فرد کے حوالے نہ کریں۔ ویزا کے حصول کے لیے متعلقہ ملک کی سفارتخانہ یا نامزد ویزا ایپلیکیشن سینٹر سے ہی رجوع کیا جائے۔
