راولپنڈی سے تعلق رکھنے والے دو مسافروں کو جعلی سفری دستاویزات پر بیرون ملک جانے کی کوشش کے دوران اسلام آباد انٹرنیشنل ایئرپورٹ پر ایف آئی اے امیگریشن نے بڑی کارروائی کرتے ہوئے آف لوڈ کر دیا۔
ایف آئی اے حکام کے مطابق مسافروں کی شناخت وحید مراد اور ارسلان رزاق کے نام سے ہوئی، جو فلائٹ نمبر 633 کے ذریعے اسپین روانہ ہو رہے تھے۔
امیگریشن کلیئرنس کے دوران مسافروں کی دستاویزات مشکوک پائی گئیں۔ مزید جانچ پڑتال پر ان کے پاسپورٹس پر لگے اسپین کے ویزے جعلی ثابت ہوئے۔
بعد ازاں دونوں مسافروں کو مزید قانونی کارروائی کے لیے اینٹی ہیومن ٹریفکنگ سرکل اسلام آباد منتقل کر دیا گیا۔ ترجمان ایف آئی اے کے مطابق واقعے کی مزید تحقیقات جاری ہیں۔
