ابوجا — شمال مغربی نائیجیریا کی ریاست زامفر کے ایک گاؤں اور فوجی اڈے پر ہفتے اور اتوار کی درمیانی شب ہونے والے مسلح حملے میں بچوں سمیت کم از کم 52 افراد کو اغوا کر لیا گیا۔ موٹر سائیکل سوار عسکریت پسندوں نے پہلے گاؤں کے باہر واقع فوجی اڈے کو نشانہ بنایا، جہاں سے رائفلیں قبضے میں لینے اور ایک پیٹرولنگ گاڑی کو نذر آتش کرنے کے بعد وہ قصوّر دجی گاؤں میں داخل ہو گئے اور گھر گھر جا کر درجنوں افراد کو یرغمال بنا لیا۔ مقامی رہائشیوں کے مطابق حملہ آور ابتدائی طور پر سو سے زائد افراد کو لے گئے تھے جن میں سے بعد میں کچھ کو چھوڑ دیا گیا جبکہ 52 افراد تاحال لاپتہ ہیں۔
فوجی ترجمان اولانیئی اوسوبا کا کہنا ہے کہ دستوں نے کامیابی کے ساتھ حملہ پسپا کیا، جس دوران ایک فوجی اور ایک پولیس اہلکار جاں بحق ہوئے جبکہ نامعلوم تعداد میں رہائشیوں کو اغوا کیا گیا۔ دوسری جانب پڑوسی ریاست سوکوٹو کے علاقے صابن برنی میں بھی ایک اور خونریز حملے میں کم از کم 11 افراد کے مارے جانے کی اطلاعات ہیں۔ نائیجیریا کے شمال مغربی اور وسطی علاقوں میں سرگرم مسلح گروہ اکثر دیہات پر حملے کرنے اور تاوان کے لیے اغوا کی وارداتوں میں ملوث رہتے ہیں۔
