راولپنڈی: راولپنڈی میں دو روز قبل لاپتہ ہونے والی 14 سالہ بچی کی لاش برآمد ہو گئی ہے۔ پولیس کے مطابق بچی کی بوری بند لاش ڈھوک حسو کے علاقے میں لیڈیز پارک کیرج فیکٹری روڈ کے قریب سے ملی۔
پولیس کا کہنا ہے کہ مصباح 22 جنوری کو گھر سے قریبی دکان پر بوتل لینے گئی تھی، تاہم واپس نہ لوٹنے پر اہل خانہ نے تشویش کا اظہار کیا۔ بچی کے اغوا کا مقدمہ 23 جنوری کو تھانہ رتہ امرال میں اس کے بھائی کی مدعیت میں درج کیا گیا تھا۔
مدعی مقدمہ نے لاش کی شناخت کر لی ہے، جسے پوسٹ مارٹم کے لیے اسپتال منتقل کر دیا گیا۔ پولیس کے مطابق موت کی وجوہات اور دیگر حقائق، جن میں ممکنہ زیادتی کے پہلو بھی شامل ہیں، پوسٹ مارٹم رپورٹ آنے کے بعد سامنے آئیں گے۔
لاش کی برآمدگی کی اطلاع ملتے ہی ایس ایس پی آپریشنز، ایس ایس پی انویسٹیگیشن اور ایس پی راول پولیس نفری کے ہمراہ موقع پر پہنچ گئے۔ جائے وقوعہ سے شواہد اکٹھے کیے جا رہے ہیں اور واقعے کی تمام پہلوؤں سے تحقیقات جاری ہیں۔
ترجمان راولپنڈی پولیس کا کہنا ہے کہ واقعے میں ملوث ملزمان کو جلد گرفتار کرکے قانون کے کٹہرے میں لایا جائے گا۔
