کراچی: سپیشل انویسٹی گیشن یونٹ (ایس آئی یو) نے کورنگی کے علاقے میں کارروائی کرتے ہوئے بین الصوبائی منشیات فروش گروہ سے تعلق رکھنے والی ایک خاتون ملزمہ کو گرفتار کر لیا۔
ایس ایس پی ایس آئی یو عمران خان کے مطابق ملزمہ کے قبضے سے 18 کلو 750 گرام چرس برآمد کی گئی۔ گرفتار خاتون رمشا شہر میں بڑے پیمانے پر منشیات فروشی میں ملوث بتائی جاتی ہے۔
پولیس کا کہنا ہے کہ ملزمہ کا شوہر فرحان اور والد طارق بھی منشیات فروشی کے کاروبار سے وابستہ رہے ہیں، جنہیں ماضی میں اینٹی نارکوٹکس فورس گرفتار کر چکی ہے۔
حکام کے مطابق منشیات کوئٹہ اور پنجگور سے کراچی سمگل کی جاتی تھی۔ ملزمہ کے خلاف ایس آئی یو میں مقدمہ درج کر لیا گیا ہے، جبکہ مزید تفتیش جاری ہے اور دیگر ساتھیوں کی گرفتاری کے لیے کوششیں کی جا رہی ہیں۔
