پاکستان میں نئے سال کا آغاز عوام کے لیے خوشخبری کے ساتھ ہوا ہے، جہاں وفاقی حکومت نے آئندہ پندرہ دنوں کے لیے پیٹرولیم مصنوعات کی قیمتوں میں نمایاں کمی کا اعلان کیا ہے، جو یکم جنوری 2026 سے نافذ العمل ہوگی۔
پیٹرولیم ڈویژن کے مطابق، پیٹرول کی قیمت میں 10 روپے 28 پیسے فی لیٹر کمی کی گئی ہے، جس کے بعد نئی قیمت 253 روپے 17 پیسے فی لیٹر مقرر کر دی گئی ہے۔ نئی قیمتیں 15 جنوری تک برقرار رہیں گی۔
پیٹرولیم ڈویژن کا کہنا ہے کہ یہ فیصلہ آئل اینڈ گیس ریگولیٹری اتھارٹی (اوگرا) کی سفارشات اور عالمی مارکیٹ کے جائزے کے بعد کیا گیا۔
اسی طرح ہائی اسپیڈ ڈیزل کی قیمت میں بھی 8 روپے 57 پیسے فی لیٹر کمی کی گئی ہے، جس کے بعد اس کی نئی قیمت 257 روپے 8 پیسے فی لیٹر ہو گئی ہے۔
گزشتہ پندرہ روزہ جائزے میں حکومت نے ڈیزل کی قیمت میں 14 روپے فی لیٹر کمی کی تھی جبکہ پیٹرول کی قیمت برقرار رکھی گئی تھی۔
پیٹرول زیادہ تر موٹر سائیکل سواروں، رکشہ ڈرائیوروں اور چھوٹی گاڑیوں کے استعمال میں آتا ہے، اس لیے اس کی قیمت میں کمی سے متوسط اور کم آمدنی والے طبقے کو براہِ راست فائدہ پہنچتا ہے۔
دوسری جانب ہائی اسپیڈ ڈیزل ٹرانسپورٹ اور زرعی شعبے میں اہم کردار ادا کرتا ہے۔ بسیں، ٹرک، ٹرینیں اور زرعی مشینری زیادہ تر ڈیزل پر چلتی ہیں۔ ڈیزل کی قیمت میں کمی سے مہنگائی پر قابو پانے میں مدد ملنے کی توقع ہے، خاص طور پر سبزیوں اور دیگر اشیائے خورونوش کی قیمتوں میں۔
