سندھ کے شہر ڈہرکی میں تیل و گیس کے نئے ذخائر دریافت ہوئے ہیں، جو ملک کے توانائی کے شعبے کے لیے ایک اہم پیش رفت قرار دی جا رہی ہے۔
ماری پیٹرولیم کمپنی لمیٹڈ (MPCL) نے پاکستان اسٹاک ایکسچینج (PSX) کو جمع کرائے گئے ایک نوٹس میں بتایا ہے کہ سندھ کے علاقے ماری غازیج میں کھدائی کے دوران تیل و گیس کے نئے ذخائر کامیابی سے دریافت ہوئے ہیں۔
ابتدائی اعداد و شمار کے مطابق، کنویں سے یومیہ تقریباً 30 لاکھ کیوبک فٹ گیس اور قابلِ ذکر مقدار میں تیل حاصل ہو رہا ہے۔
کمپنی کے مطابق یہ دریافت پاکستان کی توانائی کی ضروریات پوری کرنے اور درآمدی ایندھن پر انحصار کم کرنے میں مددگار ثابت ہوگی۔ مزید جانچ اور پیداوار کی استعداد کا جائزہ لینے کا عمل جاری ہے۔
