لاہور پولیس نے کاہنہ کے علاقے میں باپ اور دو بیٹوں کے قتل کا معمہ حل کرنے کا دعویٰ کیا ہے۔
پولیس کے مطابق تھانہ کاہنہ کی انویسٹی گیشن ٹیم نے کامیاب کارروائی کرتے ہوئے واردات میں ملوث ملزمان کو گرفتار کر لیا۔ ابتدائی تحقیقات سے معلوم ہوا ہے کہ ملزمان اور مقتولین کے درمیان لین دین کا تنازع چل رہا تھا۔
ایس پی انویسٹی گیشن شاہد نواز وڑائچ نے بتایا کہ مرکزی ملزم محکمہ صحت میں پولیو بلاک انچارج کے طور پر فرائض انجام دے رہا تھا، جبکہ اس کی ساتھی خاتون ملزمہ بھی پولیو ورکر ہے۔
پولیس کے مطابق مرکزی ملزم نے خاتون ساتھی کے ساتھ مل کر بزرگ شہری نعمان اور اس کے دو بیٹوں عمران اور کامران کو جوس میں نشہ آور گولیاں ملا کر پلائیں، جس کے باعث تینوں بے ہوش ہو گئے۔
بعد ازاں ملزمان نے بے ہوشی کی حالت میں باپ اور دونوں بیٹوں کو گلا دبا کر قتل کر دیا۔ پولیس کا کہنا ہے کہ ملزمان نے قتل کے بعد مقتولین کی موبائل بینکنگ ایپ کے ذریعے 30 لاکھ روپے اپنے اکاؤنٹس میں منتقل کیے۔
پولیس مزید تفتیش کر رہی ہے۔
