اسلام آباد: پاکستان سال 2026 کے آغاز پر دنیا کا تیسرا بڑا چاول برآمد کرنے والا ملک بن گیا ہے، جس کی تصدیق بین الاقوامی جریدے گلف نیوز کی رپورٹ سے بھی ہو گئی ہے۔ یہ کامیابی پاکستان کی زرعی برآمدات کے لیے ایک اہم سنگِ میل قرار دی جا رہی ہے۔
رپورٹ کے مطابق دسمبر 2025 میں پاکستانی چاول کی برآمدات میں 14 فیصد ماہانہ اضافہ ریکارڈ کیا گیا، جبکہ باسمتی چاول کی برآمدات میں 50 فیصد سے زائد اضافہ اس نمایاں پیش رفت کی بنیادی وجہ بنا۔
اعداد و شمار کے مطابق پاکستان نے دسمبر 2025 میں 4 لاکھ 89 ہزار ٹن چاول عالمی منڈیوں میں برآمد کیے۔ اسی عرصے میں ویتنام کی چاول برآمدات 3 لاکھ 87 ہزار ٹن رہیں، جس کے بعد پاکستان نے ویتنام کو پیچھے چھوڑتے ہوئے عالمی درجہ بندی میں تیسری پوزیشن حاصل کر لی۔
پاکستانی چاول کی سب سے زیادہ برآمدات متحدہ عرب امارات، چین، تنزانیہ، کینیا اور آئیوری کوسٹ کو کی گئیں، جو مشرق وسطیٰ، ایشیا اور افریقہ میں پاکستانی چاول کی بڑھتی ہوئی مانگ کا ثبوت ہے۔
ماہرین کے مطابق باسمتی چاول کی عالمی سطح پر مقبولیت، بہتر مسابقتی قیمتیں اور نئی منڈیوں تک رسائی نے پاکستان کو عالمی چاول مارکیٹ میں ایک مضبوط مقام دلایا ہے۔
