کراچی: کراچی کے جناح انٹرنیشنل ایئرپورٹ پر عمرہ کے لیے جانے والے ایک مسافر کے سامان سے منشیات برآمد کرلی گئی۔ ترجمان اینٹی نارکوٹکس فورس (اے این ایف) کے مطابق ملک بھر میں اسمگلنگ کے خلاف جاری کریک ڈاؤن کے دوران پانچ مختلف کارروائیوں میں پانچ ملزمان کو گرفتار کرکے 2 کروڑ 35 لاکھ روپے سے زائد مالیت کی 195.22 کلوگرام منشیات برآمد کی گئی۔
تفصیلات کے مطابق جناح ایئرپورٹ پر عمرہ کے لیے روانہ ہونے والے مسافر کے سامان سے 875 گرام آئس اور 90 گرام ہیروئن برآمد کرکے ملزم کو گرفتار کرلیا گیا۔
دوسری جانب کچلاک بائی پاس، ضلع کوئٹہ کے قریب ایک گاڑی سے 78 کلوگرام چرس برآمد کرکے دو ملزمان کو گرفتار کیا گیا۔ اسی طرح چونگی نمبر 26، اسلام آباد کے قریب گاڑی سے 18 کلوگرام چرس برآمد ہوئی، جس پر ایک ملزم کو حراست میں لے لیا گیا۔
مزید برآں جی ٹی روڈ راولپنڈی پر اسپتال کے قریب ایک ملزم سے 2.2 کلوگرام چرس برآمد کی گئی، جب کہ کچلاک بائی پاس، ضلع کوئٹہ کے قریب ایک اور کارروائی کے دوران 61 کلوگرام آئس بھی ضبط کرلی گئی۔
تمام کارروائیوں کے مقدمات انسدادِ منشیات ایکٹ 1997 کے تحت درج کر کے تحقیقات کا آغاز کر دیا گیا ہے۔
