پولیس کے مطابق تازہ واقعہ سچل کے علاقے میں پیش آیا، جہاں تیز رفتار واٹر ٹینکر نے موٹرسائیکل کو ٹکر مار دی۔ حادثے کے نتیجے میں ایک شخص جاں بحق جبکہ ایک زخمی ہوگیا۔ زخمی کو فوری طور پر اسپتال منتقل کردیا گیا۔
پولیس حکام کا کہنا ہے کہ ٹینکر ڈرائیور حادثے کے بعد فرار ہونے کی کوشش کر رہا تھا، تاہم اسے تعاقب کے بعد گرفتار کر لیا گیا۔
کراچی میں بھاری گاڑیوں، خصوصاً واٹر ٹینکرز، ڈمپرز اور ٹرالرز کی وجہ سے پیش آنے والے مہلک حادثات میں مسلسل اضافہ دیکھا جا رہا ہے۔ رواں سال شہر میں ٹریفک حادثات میں ہلاکتوں کی تعداد 312 تک پہنچ چکی ہے، جس پر شہریوں میں شدید تشویش پائی جاتی ہے۔
شہری حلقوں نے مطالبہ کیا ہے کہ بھاری گاڑیوں کی نقل و حرکت پر سخت نگرانی کی جائے، ٹریفک قوانین پر مؤثر عملدرآمد یقینی بنایا جائے، اور سڑکوں پر حفاظتی اقدامات مزید بہتر کیے جائیں۔
