کراچی: گُل احمد گروپ کے ذیلی ادارے “کوانٹم گلوبل ڈیٹا سینٹر” نے پاکستان میں 23 کروڑ ڈالر مالیت کے جدید Tier III ڈیٹا سینٹر کے قیام کا اعلان کر دیا ہے، جو 2027 تک فعال ہونے کی توقع ہے۔
کمپنی کے مطابق یہ پاکستان کے سب سے بڑے ڈیٹا سینٹر منصوبوں میں شمار ہوگا، جبکہ آئندہ 3 سے 4 سال میں اس منصوبے میں سرمایہ کاری بڑھ کر 60 کروڑ ڈالر تک پہنچ سکتی ہے۔
منصوبے کے لیے Huawei پاکستان کے ساتھ اسٹریٹجک شراکت داری بھی کی گئی ہے، جس کے تحت ایک جدید سائنس اینڈ ٹیکنالوجی پارک بھی قائم کیا جائے گا۔
Q Summit سے خطاب کرتے ہوئے چیئرمین دانش اقبال نے کہا کہ پاکستان میں مصنوعی ذہانت (AI)، کلاؤڈ کمپیوٹنگ اور ڈیجیٹل سروسز کی طلب تیزی سے بڑھ رہی ہے، جس کے باعث مقامی ڈیٹا انفراسٹرکچر کی ضرورت ناگزیر ہو چکی ہے۔
ماہرین کے مطابق یہ منصوبہ پاکستان کی ڈیجیٹل معیشت، آئی ٹی انڈسٹری اور AI سیکٹر کے فروغ میں اہم کردار ادا کرے گا اور بیرونِ ملک ڈیٹا ہوسٹنگ پر انحصار کم کرنے میں مدد دے گا۔
