کراچی/تہران — سینٹرل بینک آف ایران نے غیر ملکی کرنسیوں کے نئے سرکاری نرخ جاری کر دیے ہیں، جس کے مطابق ایرانی ریال (IRR) کی قدر میں مجموعی طور پر مزید کمی دیکھی گئی ہے اور 44 بڑی بین الاقوامی کرنسیوں کے مقابلے میں ریال کی قیمت گر گئی ہے۔ سرکاری اعداد و شمار کے مطابق، امریکی ڈالر کی سرکاری قیمت دو دن پہلے کے 1,404,259 ریال سے بڑھ کر 1,414,300 ایرانی ریال ہو گئی ہے۔ اسی طرح، 100 پاکستانی روپے کی سرکاری قیمت 505,454 ریال سے بڑھ کر 509,182 ریال تک پہنچ گئی ہے، جبکہ یورو کی سرکاری قیمت بھی بڑھ کر 1,610,084 ریال ہو گئی ہے۔ ایران کے آفیشل ‘سنا’ (SANA) ایکسچینج سسٹم کے تحت ایک امریکی ڈالر 1,514,675 ریال اور ایک یورو 1,724,354 ریال پر برقرار ہے۔
دوسری جانب، عام شہریوں اور نجی کمپنیوں کے لین دین کے لیے استعمال ہونے والی آزاد (اوپن) مارکیٹ میں ریال پر دباؤ برقرار ہے، جہاں ایک امریکی ڈالر 19 لاکھ 20 ہزار سے 19 لاکھ 50 ہزار ایرانی ریال کے درمیان ٹریڈ ہو رہا ہے۔ پاکستان کی اوپن مارکیٹ میں ایرانی ریال کی قدر میں گزشتہ ماہ کے مقابلے میں نمایاں کمی دیکھی گئی ہے، جہاں اب ایک کروڑ ایرانی ریال 4,500 سے 5,000 پاکستانی روپے میں فروخت ہو رہا ہے، جبکہ گزشتہ ماہ یہی شرح 8,000 سے 9,000 روپے کے درمیان تھی۔ اس گراوٹ کے باوجود، پاکستانی ڈیلرز اور سرحدی علاقوں کے عوام ایرانی ریال کی خرید و فروخت میں مسلسل دلچسپی لے رہے ہیں، کیونکہ مارکیٹ کو توقع ہے کہ خطے میں سفارتی کوششوں اور کشیدگی میں کمی کے بعد ایرانی کرنسی کی قدر میں دوبارہ بہتری آ سکتی ہے۔
