مکہ مکرمہ: پاکستان، سعودی عرب اور ترکیہ نے ایک مشترکہ دفاعی معاہدے پر دستخط کر دیے ہیں، جس کے تحت تینوں ممالک میں سے کسی ایک پر مسلح حملہ تینوں ریاستوں پر حملہ تصور کیا جائے گا۔ معاہدہ تینوں ممالک کے درمیان دفاعی اور سکیورٹی تعاون کو مزید وسعت دینے کی جانب اہم پیش رفت قرار دیا جا رہا ہے۔
معاہدے پر جمعے کو مکہ مکرمہ کے الصفا محل میں منعقدہ مشترکہ دفاعی سربراہی اجلاس کے دوران دستخط کیے گئے۔ وزیراعظم شہباز شریف، سعودی ولی عہد و وزیراعظم محمد بن سلمان اور ترک صدر رجب طیب اردوان نے معاہدے پر دستخط کیے۔
تینوں ممالک کی جانب سے جاری مشترکہ اعلامیے کے مطابق معاہدے کا مقصد اجتماعی دفاع کو مضبوط بنانا اور خطے سمیت دنیا میں امن، سلامتی اور استحکام کے فروغ کے لیے تعاون بڑھانا ہے۔
اعلامیے کے مطابق معاہدہ کسی بھی جارحیت کے خلاف مشترکہ دفاعی صلاحیت اور روک تھام کو مضبوط بنائے گا۔ اس کے تحت تینوں ممالک میں سے کسی ایک کے خلاف مسلح کارروائی کو سب کے خلاف حملہ تصور کیا جائے گا۔ معاہدے میں دفاعی تعاون کے مختلف شعبوں کو مزید وسعت دینے کی بھی شق شامل ہے۔
یہ معاہدہ پاکستان، سعودی عرب اور ترکیہ کے درمیان طویل عرصے سے قائم تاریخی، مذہبی اور تزویراتی تعلقات کے ساتھ ساتھ دفاعی تعاون کی سابقہ بنیادوں پر استوار کیا گیا ہے۔
دستخط کی تقریب میں چیف آف ڈیفنس فورسز و چیف آف آرمی اسٹاف فیلڈ مارشل عاصم منیر، نائب وزیراعظم و وزیر خارجہ اسحاق ڈار اور وزیر دفاع خواجہ آصف بھی موجود تھے، جبکہ سعودی عرب اور ترکیہ کے وزرائے دفاع و خارجہ نے بھی تقریب میں شرکت کی۔
مکہ مکرمہ میں معاہدے پر دستخط کیے جانے کی وجہ سے اس پیش رفت کو خصوصی علامتی اہمیت بھی حاصل ہوئی ہے۔ یہ معاہدہ تین ایسے ممالک کو دفاعی تعاون کے ایک فریم ورک میں لاتا ہے جن کی خطے میں نمایاں سیاسی اور عسکری اہمیت ہے۔
پاکستان دنیا کی واحد جوہری صلاحیت رکھنے والی مسلم اکثریتی ریاست ہے، سعودی عرب دنیا کے بڑے توانائی پیدا کرنے والے ممالک میں شامل ہے اور اسلام کے مقدس ترین مقامات کا مرکز ہے، جبکہ ترکیہ نیٹو کی بڑی عسکری طاقتوں میں شمار ہوتا ہے۔
آسٹریلین نیشنل یونیورسٹی کے اسٹریٹیجک اینڈ ڈیفنس اسٹڈیز سینٹر سے وابستہ دفاعی تجزیہ کار منصور احمد کے مطابق پاکستان اور ترکیہ دفاعی صنعت اور عسکری صلاحیت کے شعبے میں اہم کردار ادا کر سکتے ہیں، جبکہ سعودی عرب ٹیکنالوجی اور دفاعی منصوبوں کے لیے مالی وسائل فراہم کرنے کی صلاحیت رکھتا ہے۔
تاہم ان کے مطابق نئے دفاعی معاہدے میں جوہری تعاون شامل ہونے کا امکان کم ہے کیونکہ پاکستان کی جوہری دفاعی حکمت عملی بنیادی طور پر بھارت سے لاحق خطرے کے تناظر میں تشکیل دی گئی ہے۔
تازہ معاہدہ پاکستان اور سعودی عرب کے درمیان گزشتہ سال ستمبر میں ریاض میں ہونے والے دوطرفہ دفاعی معاہدے کے بعد سامنے آیا ہے۔ اس معاہدے میں بھی دونوں ممالک نے اس عزم کا اظہار کیا تھا کہ کسی ایک ملک پر حملہ دونوں کے خلاف جارحیت تصور کیا جائے گا۔
بعد ازاں ترکیہ نے پاکستان اور سعودی عرب کے درمیان موجود دفاعی تعاون کے دائرے میں شمولیت میں دلچسپی ظاہر کی تھی۔ کئی ماہ تک جاری رہنے والے مذاکرات کے بعد رواں سال ایک مسودہ تیار کیے جانے کی اطلاعات سامنے آئی تھیں۔
تینوں ممالک کے درمیان نیا دفاعی معاہدہ ایسے وقت میں ہوا ہے جب مشرق وسطیٰ میں کشیدگی میں اضافہ، امریکا اور ایران کے درمیان تنازع، غزہ کی صورتحال اور سعودی عرب و یمن کے حوثی گروپ کے درمیان بڑھتی ہوئی کشیدگی خطے کے لیے بڑے چیلنجز بنے ہوئے ہیں۔
سعودی عرب نے بحیرہ احمر میں تجارتی جہاز رانی اور توانائی کی ترسیل کے راستوں کے تحفظ کے لیے ایک کثیر ملکی بحری دفاعی تعاون کی منصوبہ بندی بھی کی ہے، جس کی حمایت کرنے والے ممالک میں پاکستان بھی شامل ہے۔
وزیراعظم شہباز شریف نے دورہ سعودی عرب کے دوران سعودی ولی عہد محمد بن سلمان سے الگ ملاقات بھی کی، جبکہ ترک صدر رجب طیب اردوان نے بھی مکہ مکرمہ میں سعودی ولی عہد سے ملاقات کی۔
وزیراعظم شہباز شریف جمعرات کو تین روزہ دورے پر سعودی عرب پہنچے تھے، جبکہ صدر اردوان جمعے کو مشترکہ دفاعی اجلاس میں شرکت کے لیے مکہ مکرمہ پہنچے۔
پاکستانی وفد میں فیلڈ مارشل عاصم منیر، نائب وزیراعظم و وزیر خارجہ اسحاق ڈار، وزیر دفاع خواجہ آصف، وزیر اطلاعات عطا اللہ تارڑ اور وزیراعظم کے معاون خصوصی طارق فاطمی بھی شامل تھے۔
ملاقاتوں کے دوران پاکستان اور سعودی عرب کے دوطرفہ تعلقات کو مزید مضبوط بنانے، تزویراتی تعاون بڑھانے اور علاقائی و عالمی معاملات پر باہمی مشاورت کے امور پر تبادلہ خیال کیا گیا۔
پاکستان اور سعودی عرب کے درمیان کئی دہائیوں سے قریبی دفاعی تعلقات قائم ہیں اور پاکستان سعودی افواج کو تربیت اور تکنیکی معاونت فراہم کرتا رہا ہے۔ پاکستان اور ترکیہ کے درمیان بھی مشترکہ فوجی مشقوں، تربیتی پروگرامز اور دفاعی سازوسامان کے شعبوں میں تعاون میں اضافہ ہوا ہے۔
حالیہ برسوں میں سعودی عرب اور ترکیہ کے دفاعی تعلقات بھی مزید مضبوط ہوئے ہیں، جن میں ترکیہ سے ڈرونز کی خریداری کا ایک بڑا معاہدہ شامل ہے، جبکہ پاکستان نے بھی سعودی عرب کی سکیورٹی ضروریات میں معاونت کے لیے فوجی اہلکار اور جنگی طیارے فراہم کیے ہیں۔
