حیدرآباد، 7 اگست 2026: سندھ بار کونسل نے عدالت میں مبینہ غیر پیشہ ورانہ طرز عمل کے ایک واقعے پر دو وکلا کے خلاف کارروائی کرتے ہوئے انہیں تین ماہ کے لیے معطل کردیا ہے۔
سندھ بار کونسل کی ایگزیکٹو کمیٹی نے عدالتی احاطے میں مبینہ غیر پیشہ ورانہ رویے کا نوٹس لیتے ہوئے ایڈووکیٹ طلال جمانی اور شہزور پنہور کو فوری طور پر تین ماہ کے لیے معطل کیا۔
فیصلے کے مطابق دونوں وکلا کو تین ماہ کے دوران بار روم میں داخل ہونے اور وکلا کا یونیفارم پہننے سے بھی روک دیا گیا ہے۔
دونوں وکلا کے خلاف معاملہ مزید کارروائی کے لیے ڈسپلنری کمیٹی کو بھیج دیا گیا ہے۔ کمیٹی مزید تادیبی کارروائی، جس میں لائسنس منسوخ کرنے کا امکان بھی شامل ہے، پر غور کرے گی۔
سندھ بار کونسل نے سینئر ایڈووکیٹ انیلا جسانی کو بھی شوکاز نوٹس جاری کرتے ہوئے 15 روز کے اندر وضاحت طلب کرلی ہے۔
بار کونسل نے زور دیا کہ وکلا ہر صورت میں قانونی پیشے کے وقار اور پیشہ ورانہ اخلاقیات کو برقرار رکھیں۔
کونسل نے واضح کیا کہ ایسے وکلا کے خلاف تادیبی کارروائی کی جائے گی جو پیشہ ورانہ اصولوں کی خلاف ورزی یا قانونی شعبے کی بدنامی کا باعث بننے والے کسی عمل میں ملوث پائے گئے۔
