پانچ سال قبل دنیا بھر میں تباہی مچانے والی کورونا وبا نے ایک بار پھر سے خطرے کی گھنٹی بجا دی ہے۔ دو ایشیائی ممالک، ہانگ کانگ اور سنگاپور میں کووِڈ-19 کے کیسز میں تیزی سے اضافہ ریکارڈ کیا جا رہا ہے، جس پر دونوں ممالک کی وزارت صحت نے الرٹ جاری کر دیا ہے۔
عالمی میڈیا رپورٹس کے مطابق، ہانگ کانگ اور سنگاپور میں وائرس کے بڑھتے ہوئے کیسز کے بعد مقامی حکام نے عوام کو محتاط رہنے کی ہدایت جاری کی ہے۔ حالیہ ٹیسٹ رپورٹس میں متعدد نمونے مثبت آئے ہیں، جب کہ 3 مئی کو ختم ہونے والے ہفتے میں 31 اموات رپورٹ ہوئیں، جو رواں سال کی سب سے زیادہ تعداد ہے۔ اگرچہ ماضی کے مقابلے میں کیسز کی تعداد کم ہے، تاہم حکام نے وائرل لوڈ میں اضافے پر تشویش ظاہر کی ہے۔
سنگاپور کی وزارت صحت نے تقریباً ایک سال بعد کووِڈ کیسز پر رپورٹ جاری کرتے ہوئے بتایا ہے کہ 3 مئی تک مثبت کیسز کی تعداد 14,200 تک پہنچ گئی ہے، جو پچھلے اندازوں سے 28 فیصد زیادہ ہے۔ اسپتالوں میں مریضوں کی آمد میں بھی اضافہ دیکھا گیا ہے۔
ادھر تھائی لینڈ اور چین میں بھی کورونا کے نئے کیسز کی بڑی تعداد سامنے آ رہی ہے۔ حکام کے مطابق مدافعتی نظام میں کمی کی وجہ سے وائرس ایک بار پھر پھیلنے لگا ہے۔
کورونا کے دوبارہ پھیلاؤ کے خدشے کے پیشِ نظر مختلف ممالک میں صحت حکام الرٹ ہو چکے ہیں، اور عوام کو احتیاطی تدابیر اختیار کرنے کی تلقین کی جا رہی ہے۔ شہریوں کو ہدایت دی گئی ہے کہ وہ ہجوم والے مقامات سے گریز کریں، ماسک پہنیں اور سماجی فاصلہ برقرار رکھیں
