کراچی: وفاقی اردو یونیورسٹی کے عبدالحق کیمپس میں شعبہ ابلاغ عامہ کے زیر اہتمام "ریسرچ اینڈ پلاننگ” کے عنوان سے ایک روزہ ورکشاپ کا انعقاد کیا گیا۔ ورکشاپ کی نظامت ڈاکٹر ثمرین فیصل نے انجام دی، جبکہ مہمانِ خصوصی زیبش یونیورسٹی کی پی ایچ ڈی اسکالر ڈاکٹر سارہ واحد تھیں۔
ورکشاپ میں شعبہ ابلاغ عامہ کے ساتویں سمسٹر کے 40 طلبہ و طالبات نے بھرپور شرکت کی۔ ڈاکٹر سارہ واحد نے ریسرچ کے مختلف مراحل پر تفصیلی روشنی ڈالتے ہوئے موضوع کے انتخاب، ریسرچ کی اقسام، اور کامیاب تحقیقی طریقہ کار پر لیکچر دیا۔ انہوں نے شرکاء کو عملی مشقوں کے ذریعے مفروضات بنانے اور تحقیق کی منصوبہ بندی کے عملی پہلوؤں سے روشناس کرایا۔
اس موقع پر ڈاکٹر سارہ واحد نے اپنے 15 سالہ تجربے کو بھی طلبہ کے ساتھ شیئر کیا، جسے طلبہ نے بے حد سراہا۔ اختتام پر ڈاکٹر ثمرین فیصل نے ڈاکٹر سارہ واحد کا شکریہ ادا کیا اور انہیں گلدستہ پیش کیا۔
ورکشاپ کا مقصد طلبہ کو تحقیق کی عملی تربیت دینا اور ابلاغ عامہ کے شعبے میں مؤثر منصوبہ بندی کے اصولوں سے آگاہ کرنا تھا۔
