اسلام آباد — محکمہ موسمیات نے عیدالاضحیٰ کی تعطیلات کے دوران خیبرپختونخوا کے کئی اضلاع میں بارش کی پیشگوئی کی ہے، خاص طور پر 7 سے 9 جون کے درمیان دیر، سوات، چترال، کوہستان اور مانسہرہ میں بارش متوقع ہے۔
میدانی علاقوں میں عید کے دنوں کے دوران موسم شدید گرم اور خشک رہے گا۔
محکمہ موسمیات کے مطابق شمال مشرقی علاقوں میں مرطوب ہوائیں داخل ہو رہی ہیں جبکہ 3 جون کو مغربی ہواؤں کا سلسلہ بالائی علاقوں میں داخل ہوگا۔ اس سسٹم کے زیر اثر کشمیر، گلگت بلتستان، مری، گلیات اور خیبرپختونخوا کے چترال، دیر، سوات، مالاکنڈ، مانسہرہ، بٹگرام، شانگلہ، کوہستان اور ایبٹ آباد میں 2 سے 5 جون کے دوران بارش، گرد و غبار کے طوفان اور بعض مقامات پر ژالہ باری اور تیز بارش کا امکان ہے۔
اسلام آباد، راولپنڈی، پوٹھوہار ریجن، لاہور اور پنجاب و خیبرپختونخوا کے دیگر اضلاع جیسے اٹک، چکوال، جہلم، میانوالی، سرگودھا، حافظ آباد، منڈی بہاؤالدین، گوجرانوالہ، گوجرات، سیالکوٹ، نارووال، فیصل آباد، جھنگ، ٹوبہ ٹیک سنگھ، ہری پور، پشاور، مردان، صوابی، نوشہرہ، چارسدہ، باجوڑ، مہمند، خیبر، اورکزئی، کرم، کوہاٹ، بنوں، کرک اور وزیرستان میں بھی 3 اور 4 جون کو بارش اور گرد و غبار کے طوفان کی پیشگوئی کی گئی ہے۔
اس کے علاوہ جنوبی پنجاب میں اس دوران گرد آلود ہوائیں چلنے کا امکان ہے۔
