دسمبر 13، 2025
ویب ڈیسک
دبئی پولیس نے امارت میں متوقع بارش اور غیر مستحکم موسم کے باعث موٹر سواروں کو سڑکوں پر خصوصی احتیاط برتنے کی ہدایت جاری کی ہے۔ حکام کے مطابق پھسلن اور کم حدِ نگاہ کی وجہ سے ٹریفک حادثات کا خدشہ بڑھ سکتا ہے۔
ڈرائیوروں کو ٹریفک قوانین پر سختی سے عمل کرنے، رفتار کم رکھنے اور گاڑیوں کے درمیان محفوظ فاصلہ برقرار رکھنے کا مشورہ دیا گیا ہے۔ پولیس نے خراب موسم میں اچانک بریک لگانے سے گریز اور مکمل توجہ کے ساتھ ڈرائیونگ پر زور دیا ہے۔
حکام نے بتایا کہ بارش کے باعث پیش آنے والے ٹریفک حادثات سے نمٹنے کے لیے تمام ہنگامی اور امدادی ٹیمیں مکمل طور پر الرٹ ہیں۔ پہاڑی اور وادی علاقوں میں ممکنہ واقعات کے لیے بھی خصوصی انتظامات کیے گئے ہیں۔
دبئی پولیس نے عوام کو سختی سے ہدایت کی ہے کہ وہ بارش کے دوران پانی کے نالوں یا وادیوں کے قریب نہ جائیں اور انہیں عبور کرنے کی کوشش نہ کریں۔ حکام نے واضح کیا کہ عوامی تحفظ اولین ترجیح ہے اور شہری تعاون کو یقینی بنائیں۔
