راولپنڈی / اسلام آباد: جنوبی افریقہ کے ایئر فورس چیف لیفٹیننٹ جنرل وائزمین سیمو مبامبو نے پاکستان کا دورہ کرتے ہوئے اعلیٰ پاکستانی عسکری قیادت سے ملاقاتیں کیں تاکہ دوطرفہ دفاعی تعاون اور علاقائی ہم آہنگی کو فروغ دیا جا سکے۔
جمعرات کو جنرل مبامبو نے چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے جوائنٹ اسٹاف ہیڈکوارٹرز راولپنڈی میں ملاقات کی۔ آئی ایس پی آر کے مطابق دونوں رہنماؤں کے درمیان باہمی دلچسپی کے امور اور دفاعی اشتراک پر تفصیلی تبادلہ خیال ہوا۔
جنرل مرزا نے خطے کی سیکیورٹی صورتحال پر پاکستان کے مؤقف سے آگاہ کیا اور امن کے قیام میں پاکستان کے کردار کو اجاگر کیا۔ معزز مہمان نے پاکستانی افواج کی پیشہ ورانہ صلاحیت اور دہشت گردی کے خلاف قربانیوں کو سراہا۔
جوائنٹ اسٹاف ہیڈکوارٹرز آمد پر مہمان جنرل کو تینوں افواج کے چاق و چوبند دستے نے گارڈ آف آنر پیش کیا۔
پاک فضائیہ کے سربراہ سے ملاقات
اس سے قبل، جنوبی افریقہ کے ایئر چیف نے ایئر چیف مارشل ظہیر احمد بابر سدھو سے ایئر ہیڈکوارٹر اسلام آباد میں ملاقات کی۔
دونوں رہنماؤں نے پاک فضائیہ اور جنوبی افریقی ایئر فورس کے درمیان گہرے تعلقات پر زور دیتے ہوئے مشترکہ تربیتی پروگرامز، صلاحیت سازی اور ادارہ جاتی تعاون کو مزید فروغ دینے پر اتفاق کیا۔
ایئر چیف مارشل سدھو نے یقین دہانی کرائی کہ پاک فضائیہ جنوبی افریقی فضائیہ کو جدید تربیت اور تعاون فراہم کرے گی، اور آپریشنل مشقوں میں مبصرین کے طور پر شرکت کی دعوت دی۔
لیفٹیننٹ جنرل مبامبو نے پاک فضائیہ کی کثیر الجہتی جنگی صلاحیتوں اور تکنیکی برتری کی تعریف کی اور جنوبی افریقہ کے C-130 طیاروں کی مرمت و دیکھ بھال پاکستان میں کروانے کی خواہش کا اظہار کیا۔
