انیبہ ضمیر شاہ
15 جولائی 2025
محکمہ موسمیات پاکستان کے مطابق، رواں سال یکم سے 14 جولائی کے دوران ملک بھر میں مجموعی طور پر گزشتہ سال کے اسی عرصے کے مقابلے میں زیادہ بارش ہوئی، تاہم مختلف علاقوں میں بارش کا رجحان نمایاں طور پر مختلف رہا۔
رپورٹ کے مطابق، بلوچستان میں بارش کی مقدار معمول سے 187 فیصد زیادہ رہی، جوکہ اس سال کی سب سے نمایاں تبدیلی ہے۔ یاد رہے کہ گزشتہ سال اسی مدت میں بلوچستان میں معمول کے قریب بارش ریکارڈ کی گئی تھی۔
پنجاب میں بھی بارش کا نمایاں اضافہ دیکھنے میں آیا، جہاں معمول سے 81.6 فیصد زیادہ بارش ہوئی، جبکہ 2024 میں یہ اضافہ 72.4 فیصد تھا۔ خیبر پختونخوا اور آزاد کشمیر میں بھی معمول سے بالترتیب 34.9 فیصد اور 19.3 فیصد زیادہ بارش ریکارڈ کی گئی۔
دوسری جانب، سندھ اور گلگت بلتستان میں بارشوں کی کمی مسلسل دوسرے سال بھی برقرار رہی۔ سندھ میں اس سال معمول سے 66.2 فیصد کم بارش ہوئی، جبکہ گزشتہ سال یہ کمی 68.6 فیصد تھی۔
صحت کے حکام نے سندھ میں بارشوں کی مسلسل کمی پر تشویش کا اظہار کیا ہے، اور خبردار کیا ہے کہ دو سال کی خشک سالی زرعی پیداوار اور عوامی صحت کے لیے سنگین نتائج لا سکتی ہے۔
محکمہ موسمیات نے متعلقہ حکام کو مشورہ دیا ہے کہ وہ آئندہ ہفتوں میں ممکنہ موسمی تغیرات کے پیش نظر احتیاطی اقدامات کریں۔
