مریخ پر بجلی کے ننھے جھٹکوں کی تصدیق — ناسا کا اہم انکشاف
— ناسا نے پہلی بار مریخ پر بجلی کی ننھی برقی چمکوں کی موجودگی کی تصدیق کر دی ہے، جب اس کے پرسیورینس روور نے سرخ سیارے پر اڑتے گردوغبار کے طوفانوں کے دوران ہلکی سی “چٹخ” کی آوازیں ریکارڈ کیں۔
ماہرینِ فلکیات طویل عرصے سے شبہ ظاہر کرتے آئے تھے کہ مریخی ماحول میں گرد کے ذرات ایک دوسرے سے ٹکرا کر برقی قوت پیدا کر سکتے ہیں، لیکن اس کی براہِ راست شہادت اب تک دستیاب نہ تھی۔ روور کے مائیکروفون نے یہ آوازیں تحقیق سے ہٹ کر معمول کے مشن کے دوران اتفاقیہ طور پر محفوظ کیں۔
بین الاقوامی جریدے "نیچر” میں شائع ہونے والی نئی تحقیق کے مطابق یہ برقی چارج بے حد معمولی نوعیت کے ہیں اور زمین پر ہونے والی طوفانی بجلی سے بالکل مختلف۔ مریخ پر یہ چمکیں چند ملی میٹر سے سینٹی میٹر تک ہوتی ہیں، بالکل اسی طرح جیسے خشک ماحول میں گاڑی کا دروازہ چھونے پر جھٹکا لگتا ہے۔
ماہرین کہتے ہیں کہ عمل اس وقت شروع ہوتا ہے جب مٹی کے نہایت باریک ذرات ایک دوسرے سے رگڑ کھا کر چارج ہوتے ہیں اور پھر اچانک توانائی خارج ہو کر چھوٹے جھٹکے پیدا کرتی ہے جنہیں آواز کی صورت میں سنا جا سکتا ہے۔
سائنس دانوں کے مطابق مریخ پر گرد کے طوفان اور موسمی ہوائیں ان برقی سرگرمیوں کو بڑھا سکتی ہیں۔ چونکہ مریخ کا ماحول زمین کے مقابلے میں بہت پتلا ہے، اس لیے معمولی برقی طاقت بھی خارج ہو کر چمک پیدا کر دیتی ہے۔
ماضی میں بھی کئی مشنوں نے مریخ کی بجلی کا سراغ لگانے کی کوشش کی تھی، لیکن 2016 میں یورپی خلائی ادارے کا خلائی جہاز لینڈنگ کے دوران تباہ ہو گیا اور تحقیق ادھوری رہ گئی۔
اگرچہ بعض ماہرین کا خیال ہے کہ بصری شواہد (روشنی کی چمک) کی اب بھی ضرورت ہے، مگر زیادہ تر سائنس دان اس دریافت کو مریخ کے موسم اور ماحولیاتی نظام کو سمجھنے کی جانب اہم پیش رفت قرار دے رہے ہیں۔
تحقیق سے یہ بھی اندازہ ہوتا ہے کہ مریخ کی سطح پر نامیاتی مالیکیولز، جنہیں زندگی کی ممکنہ علامت سمجھا جاتا ہے، انہی برقی جھٹکوں کے باعث ٹوٹ پھوٹ کا شکار ہوتے ہوں گے۔ یہی وجہ ہو سکتی ہے کہ مریخ پر پایا گیا میتھین بہت تیزی سے ختم ہو جاتا ہے — جو سائنس کے لیے ایک معمہ تھا۔
یہ انکشاف مستقبل کے مریخی مشنز کے لیے بھی اہم ہے۔ ماہرین کے مطابق روبوٹک آلات کے ساتھ ساتھ انسان بردار مشنز کو بھی اس برقی ماحول کے خطرات مدنظر رکھ کر ڈیزائن کیا جانا چاہیے تاکہ اسپیس سوٹس اور آلات کسی ممکنہ نقصان سے محفوظ رہیں۔
ماہرین نے زور دیا ہے کہ مریخ پر بجلی کی یہ سرگرمیاں کم توانائی رکھتی ہیں، لیکن مریخ پر انسانی آبادکاری کے منصوبوں کی تیاری کرتے ہوئے اس کی مسلسل نگرانی ضروری ہو گی۔
