کراچی: 19 جولائی 2025ء کو عزیز آباد کے علاقے میں ڈکیتی کی واردات اس وقت ناکام ہو گئی جب ایک بہادر شہری کی بروقت جوابی کارروائی نے صورتحال کا رخ بدل دیا۔ واقعے کی سی سی ٹی وی فوٹیج منظر عام پر آ گئی ہے۔
فوٹیج میں دیکھا جا سکتا ہے کہ ہوٹل پر بیٹھے پانچ نوجوان موبائل فون استعمال کر رہے تھے کہ اسی دوران موٹر سائیکل پر سوار تین مسلح ملزمان وہاں پہنچے۔ ڈاکوؤں نے شہریوں سے اسلحہ کے زور پر موبائل فونز چھیننے کی کوشش کی۔
اسی دوران ایک نوجوان نے ہمت کا مظاہرہ کرتے ہوئے اپنا اسلحہ نکالا اور ڈاکوؤں پر فائرنگ کر دی۔ شہری کی فائرنگ سے ایک ڈاکو موقع پر ہی ہلاک ہو گیا، جبکہ دوسرا موٹر سائیکل پر فرار ہو گیا اور تیسرا پیدل بھاگ نکلا۔
پولیس کے مطابق یہ واقعہ عزیز آباد تھانے کی حدود میں پیش آیا۔ ہلاک ڈاکو کی شناخت کا عمل جاری ہے، جبکہ فرار ملزمان کی تلاش کے لیے چھاپے مارے جا رہے ہیں۔ علاقے میں حالیہ دنوں میں ڈکیتی اور اسٹریٹ کرائمز میں اضافے پر شہریوں میں شدید تشویش پائی جاتی ہے
