9 ستمبر، 2025
ویب ڈیسک
کراچی:
شہر قائد میں بارش برسانے والا مون سون سسٹم اپنی شدت کھو بیٹھا ہے اور ڈیپ ڈپریشن سے ڈپریشن میں تبدیل ہوگیا ہے۔ تاہم محکمہ موسمیات کے مطابق یہ اب بھی طاقتور نظام ہے اور کراچی میں آج دوپہر کے بعد تیز اور موسلا دھار بارش کے امکانات موجود ہیں۔
محکمہ موسمیات کے ترجمان انجم نذیر ضیغم کا کہنا ہے کہ یہ سسٹم اس وقت حیدرآباد سے تقریباً 50 کلومیٹر کے فاصلے پر موجود ہے، جہاں گزشتہ روز سے اب تک 85 ملی میٹر بارش ریکارڈ کی جاچکی ہے، جبکہ ڈیپلو میں 108 ملی میٹر بارش ہوئی ہے۔ امکان ظاہر کیا جارہا ہے کہ یہ سسٹم 11 ستمبر تک بلوچستان کے ساحلی علاقے کے قریب پہنچ کر ختم ہوجائے گا۔
ادارے نے پیش گوئی کی ہے کہ کراچی میں آج 4 سے 6 بارش کے اسپیل آسکتے ہیں، جن میں بعض مقامات پر بارش کی مقدار 100 ملی میٹر سے بھی بڑھ سکتی ہے۔ ماہرین کے مطابق یہ غیر معمولی نظام بھارت کی جانب سے سندھ میں داخل ہوا ہے اور اس کا راستہ پیچیدہ ہونے کے باعث مختلف علاقوں میں بارش کی شدت مختلف رہ سکتی ہے۔
شدید بارش کے پیش نظر محکمہ موسمیات اور ضلعی انتظامیہ نے شہریوں کو اربن فلڈنگ کے خطرے سے خبردار کرتے ہوئے احتیاطی تدابیر اختیار کرنے کی ہدایت کی ہے۔ ملیر ندی میں گزشتہ روز برسوں بعد سیلابی کیفیت پیدا ہوئی، جبکہ نشیبی علاقوں میں پانی جمع ہونے کی شکایات بھی سامنے آئی ہیں۔
