کراچی : کراچی کے علاقے سرجانی ٹاؤن سیکٹر 51 میں گھر کی چھت سے پھندے سے لٹکی 11 سالہ آسیہ کی لاش ملنے کے واقعے میں اہم پیش رفت سامنے آئی ہے۔ پولیس سرجن ڈاکٹر سمعیہ کے مطابق پوسٹ مارٹم کے دوران بچی کے ساتھ زیادتی اور گلا گھونٹ کر قتل کیے جانے کے شواہد ملے ہیں۔
تمام حیاتیاتی، کیمیائی اور زہریلے مادوں کے نمونے محفوظ کر لیے گئے ہیں تاکہ ڈی این اے پروفائلنگ اور دیگر تجزیے کیے جا سکیں۔ ایس ایچ او عرفان آصف کے مطابق ایم ایل او کی زبانی اطلاع کے مطابق بچی کو گلا گھونٹ کر قتل کیا گیا، تاہم زیادتی کی تصدیق تحریری رپورٹ کے بعد ہی ممکن ہوگی۔
پولیس نے پوسٹ مارٹم کے بعد لاش ورثا کے حوالے کر دی، اور مقتولہ کی تدفین بھی کر دی گئی ہے۔ مکمل رپورٹ موصول ہونے پر مقدمہ سرکار کی مدعیت میں درج کیا جائے گا۔
