نیویارک — عرب اسلامی سربراہی اجلاس کے اختتام پر وزیراعظم پاکستان شہباز شریف اور امریکی صدر ڈونلڈ ٹرمپ کے درمیان خوشگوار ماحول میں غیر رسمی گفتگو ہوئی۔ اس موقع پر ڈپٹی وزیراعظم اسحاق ڈار بھی وزیراعظم کے ہمراہ موجود تھے۔
اجلاس کے بعد عالمی رہنماؤں کے درمیان گرمجوشی سے مصافحہ اور بے تکلفانہ تبادلہ خیال دیکھنے میں آیا۔ ترک صدر رجب طیب اردوان نے اس ملاقات کو "انتہائی مفید” قرار دیا۔
اقوام متحدہ کی جنرل اسمبلی کے اجلاس سے قبل وزیراعظم شہباز شریف نے قطر کے امیر شیخ تمیم بن حمد الثانی، اردن کے فرمانروا شاہ عبداللہ دوم اور انڈونیشیا کے صدر پرابوو سوبیانتو سے بھی ملاقات کی، جہاں خطے کے حالات اور امن کے امکانات پر بات چیت کی گئی۔
اگرچہ اجلاس کے دوران مسلم ممالک کے رہنماؤں نے امن کے لیے اپنے مؤقف اور تجاویز پیش کیں، تاہم کسی مشترکہ لائحہ عمل کا باضابطہ اعلان نہیں کیا گیا۔
