کراچی — ایم کیو ایم پاکستان کے رہنما فاروق ستار نے کہا ہے کہ اگر پیپلز پارٹی اور میئر کراچی کوئی کام سیدھے طریقے سے مکمل کردیں تو اس پر ہزاروں ڈالر کا انعام رکھا جانا چاہیے۔
کراچی میں پریس کانفرنس کرتے ہوئے انہوں نے گرین لائن منصوبے کی مثال دی اور کہا کہ یہ چند ماہ میں مکمل ہونا تھا لیکن 18 ستمبر کو اس پر کام روک دیا گیا۔ ان کے مطابق 2017 میں منصوبے کی این او سی لی گئی تھی مگر اسے صرف اس لیے روکا گیا کہ اس کا کریڈٹ ایم کیو ایم کو ملتا۔
فاروق ستار نے مزید کہا کہ سندھ حکومت ریڈ لائن سمیت کئی منصوبوں میں الجھی ہوئی ہے جنہیں اب تک مکمل نہیں کیا جا سکا۔ "2008 سے کے فور منصوبے پر بیٹھے رہے مگر کچھ نہیں کیا گیا، اگر اب یہ مکمل ہو رہا ہے تو صرف ایم کیو ایم کی کوششوں کی وجہ سے ہے۔”
ان کا کہنا تھا کہ مسئلہ صرف پانی لانے کا نہیں بلکہ اس کی منصفانہ تقسیم کا بھی ہے، جس پر فوری توجہ دینا ہوگی۔
