تربت، 26 ستمبر 2025: گورنمنٹ بوائز ماڈل ہائی اسکول تربت میں طلبہ اور اساتذہ کو طبی سہولیات فراہم کرنے کے لیے ایک نئی ڈسپنسری کا افتتاح کر دیا گیا۔ یہ اقدام بلوچستان کے اسپیشل سیکریٹری ہیلتھ شیحک بلوچ کے تعاون سے کیا گیا ہے، جس کا مقصد اسکول کی حدود میں بر وقت فرسٹ ایڈ اور بنیادی علاج معالجے کی سہولت یقینی بنانا ہے۔
افتتاحی تقریب کی سربراہی نامور ماہرِ تعلیم اور سابق استاد مراد بخش بلوچ نے کی، جبکہ پرنسپل اکبر اسماعیل، وائس پرنسپل عبدالرشید اور سینئر فیکلٹی ممبران بھی اس موقع پر موجود تھے۔
مقررین نے ڈسپنسری کے قیام کو ایک مثبت اور نہایت ضروری پیش رفت قرار دیتے ہوئے کہا کہ یہ سہولت نہ صرف معمولی بیماریوں اور ہنگامی حالات میں علاج فراہم کرے گی بلکہ والدین کو بھی یہ اطمینان ہوگا کہ اُن کے بچے ایک محفوظ اور صحت مند ماحول میں تعلیم حاصل کر رہے ہیں۔
شرکاء نے اسپیشل سیکریٹری ہیلتھ شیحک بلوچ کی کاوشوں کو سراہا اور امید ظاہر کی کہ محکمہ صحت صوبے کے دیگر تعلیمی اداروں میں بھی اسی طرح صحت کی سہولیات کے دائرہ کار کو بڑھائے گا۔
