واشنگٹن، – وزیراعظم محمد شہباز شریف نے وائٹ ہاؤس کے اوول آفس میں امریکی صدر ڈونلڈ ٹرمپ سے اہم ملاقات کی۔ یہ ملاقات ایک گھنٹہ 20 منٹ تک جاری رہی، جس میں آرمی چیف فیلڈ مارشل سید عاصم منیر بھی شریک تھے۔
وزیراعظم آفس کے مطابق ملاقات خوشگوار ماحول میں ہوئی، جس میں دو طرفہ تعلقات، علاقائی اور عالمی امور پر تفصیلی تبادلہ خیال کیا گیا۔ امریکی نائب صدر جے ڈی وینس اور سیکریٹری آف اسٹیٹ مارکو روبیو بھی موجود تھے۔
اس سے قبل صدر ڈونلڈ ٹرمپ نے صحافیوں سے گفتگو میں وزیراعظم شہباز شریف اور فیلڈ مارشل عاصم منیر کو ’’شاندار رہنما‘‘ قرار دیا۔ انہوں نے کہا کہ پاکستان کے وزیراعظم اور فیلڈ مارشل غیر معمولی شخصیت کے حامل ہیں۔
وزیراعظم شہباز شریف کی وائٹ ہاؤس آمد پر اینڈریو ایئربیس پر ریڈ کارپٹ استقبال کیا گیا۔ امریکی ایئر فورس کے اعلیٰ عہدیدار نے ان کا پرتپاک خیرمقدم کیا اور سخت سیکیورٹی میں موٹرکیڈ کے ذریعے انہیں وائٹ ہاؤس پہنچایا گیا۔
وزیراعظم اس وقت جنرل اسمبلی کے 80 ویں اجلاس میں شرکت کے لیے نیویارک میں موجود ہیں، جہاں آج وہ اجلاس سے خطاب کریں گے۔ واضح رہے کہ گزشتہ روز عرب-اسلامی سربراہی کانفرنس کے موقع پر بھی وزیراعظم شہباز شریف اور امریکی صدر ٹرمپ کی ملاقات ہوئی تھی۔
