پاکستان کے معروف اولمپین ارشد ندیم نے کہا ہے کہ وہ آئندہ کامن ویلتھ گیمز میں گولڈ میڈل جیتنے کے لیے پوری محنت اور لگن کے ساتھ تیاری کر رہے ہیں۔
دبئی میں جیو نیوز سے خصوصی گفتگو کرتے ہوئے ارشد ندیم کا کہنا تھا کہ وہ چاہتے ہیں کہ کامن ویلتھ اور ایشین گیمز میں پاکستان کا سبز ہلالی پرچم سربلند ہو۔
انہوں نے دبئی حکومت کا شکریہ ادا کرتے ہوئے کہا کہ شیخ محمد بن راشد ایوارڈ ملنا ان کے لیے اعزاز ہے اور اس عالمی اسپورٹس ایوارڈ نے ان کے حوصلے کو مزید مضبوط کیا ہے۔
ارشد ندیم نے کہا کہ دبئی حکومت کی جانب سے حوصلہ افزائی نے جیت کی نئی امید پیدا کی ہے، اور دبئی میں عالمی سطح پر ملنے والا یہ اسپورٹس ایوارڈ پاکستان کے لیے باعث فخر ہے۔
دبئی میں کھیلوں کے عالمی ستاروں کی تقریب منعقد ہوئی، جہاں 17ویں شیخ محمد بن راشد گلوبل اسپورٹس ایوارڈ کے دوران ارشد ندیم کو خصوصی اعزاز سے نوازا گیا۔
