پاکستان کے سینئر ہاکی کھلاڑی ڈیلی الاؤنس میں کمی کے باعث شدید ناراضی کا اظہار کر رہے ہیں، اور خدشہ ظاہر کیا جا رہا ہے کہ وہ پرو لیگ کے اگلے مرحلے میں حصہ نہ لیں۔
ارجنٹینا جانے والے قومی کھلاڑیوں کو 30 ہزار روپے یومیہ الاؤنس دینے کا وعدہ کیا گیا تھا، مگر انہیں صرف 11 ہزار روپے فی دن کے حساب سے رقم جاری کی گئی۔
کھلاڑیوں نے اس صورتحال پر مینجمنٹ اور پاکستان ہاکی فیڈریشن (پی ایچ ایف) دونوں کو اپنے تحفظات سے آگاہ کر دیا ہے۔
پاکستان ہاکی ٹیم پرو لیگ کے دوسرے مرحلے کے لیے فروری میں آسٹریلیا روانہ ہوگی، لیکن یومیہ بھتے میں کٹوتی کی وجہ سے کھلاڑیوں کی شرکت اب سوالیہ نشان بن چکی ہے۔
ذرائع کے مطابق کھلاڑیوں کا مؤقف ہے کہ ویسے ہی ڈیلی الاؤنس مشکل سے ملتا ہے، اور جب ملا تو آدھا بھی نہیں—جس پر وہ خاصے ناخوش ہیں۔
اصل سوال یہ ہے کہ کھلاڑیوں کو کم رقم کیوں ملی؟
پی ایچ ایف نے فی کھلاڑی یومیہ 30 ہزار روپے مقرر کر رکھے ہیں، تاہم پرو لیگ کے اخراجات پاکستان اسپورٹس بورڈ (پی ایس بی) برداشت کر رہا ہے، جس کے قوانین کے تحت غیر ملکی ٹور پر کھلاڑی کو صرف 40 ڈالر (تقریباً 11 ہزار 300 روپے) یومیہ دیے جاتے ہیں۔
پی ایس بی کے مطابق 15 دن کے ٹور کے لیے فی پلیئر 1 لاکھ 68 ہزار 950 روپے پی ایچ ایف کو ادا کر دیے گئے ہیں۔
دوسری جانب کھلاڑیوں کا کہنا ہے کہ اگر حساب 30 ہزار یومیہ کے مطابق کیا جائے تو انہیں 4 لاکھ 49 ہزار 648 روپے ملنے چاہئیں۔
پی ایس بی کا مؤقف ہے کہ اگر پی ایچ ایف کھلاڑیوں کو 30 ہزار روزانہ دینا چاہتا ہے تو وہ اپنی جیب سے دے—پی ایس بی نے ادائیگی روکنے یا منع کرنے کی کوئی ہدایت نہیں دی۔
