پشاور — خیبرپختونخوا کے وزیراعلیٰ علی امین گنڈاپور نے وادی تیراہ میں پیش آنے والے واقعے میں جاں بحق افراد کے لواحقین کے لیے ایک، ایک کروڑ روپے معاوضے کا اعلان کیا ہے۔
ڈان نیوز کے مطابق وزیراعلیٰ سے ضلع خیبر کے وفد نے ملاقات کی جس میں امن و امان کی صورتحال کا جائزہ لیا گیا۔ اجلاس میں چیف سیکریٹری، ایڈیشنل چیف سیکریٹری داخلہ اور کمشنر پشاور سمیت اعلیٰ حکام شریک تھے۔
اجلاس میں شہداء کے درجات کی بلندی کے لیے دعا کی گئی جبکہ آئندہ ایسے واقعات کی روک تھام کے لیے لائحہ عمل پر غور کیا گیا۔ وزیراعلیٰ نے کہا کہ عام شہریوں کی شہادت افسوسناک اور ناقابل قبول ہے۔
مقررہ لائحہ عمل کے تحت مقامی مشران پر مشتمل جرگے کی اعلیٰ عسکری حکام سے ملاقات کرائی جائے گی تاکہ مستقبل میں پائیدار امن قائم کیا جا سکے۔
خیال رہے کہ مقامی نمائندوں کے مطابق واقعے میں خواتین اور بچے بھی جاں بحق ہوئے، تاہم اس سانحے کی ذمہ داری کس پر عائد ہوتی ہے، اس حوالے سے آزادانہ تصدیق تاحال ممکن نہیں ہو سکی۔
