پنجاب میں سیلاب کے بعد پاک فوج کا ریسکیو اور ریلیف آپریشن جاری ہے۔ سیالکوٹ، نارووال، ظفروال اور وزیرآباد سمیت کئی علاقوں میں فری میڈیکل کیمپس اور راشن کی تقسیم کا عمل مکمل کرلیا گیا۔
مختلف کیمپس میں سیکڑوں مریضوں کا مفت علاج اور ادویات فراہمی کی گئیں۔ پاک فوج کی جانب سے لاپتہ افراد کی تلاش اور ممکنہ سیلاب سے نمٹنے کے لیے بھی بھرپور انتظامات جاری ہیں۔
سیالکوٹ میں پاک فوج نے متاثرین سیلاب کیلئے راشن کی تقسیم کے ساتھ فری میڈیکل کیمپس کا بھی انعقاد کیا، جہاں 108 مرد، 126 خواتین اور 98 بچوں کا مفت علاج کیا گیا۔ نارووال اور ظفروال میں قائم کیے گئے میڈیکل کیمپس میں بھی 270 مریضوں کو طبی سہولیات اور مفت ادویات فراہم کی گئیں۔
وزیرآباد اور اس کے گردونواح میں بھی پاک فوج کی جانب سے فری میڈیکل کیمپس لگائے گئے، جہاں بچوں اور خواتین سمیت مجموعی طور پر 270 افراد کو مفت طبی امداد دی گئی۔ پتوکی، بہرام، تاہلی والا اور رام گڑھ جیسے علاقوں میں بھی امدادی کیمپس قائم کیے گئے ہیں۔
