دبئی ایئر شو میں جمعے کے روز بھارتی فضائیہ (IAF) کا دیسی ساختہ لڑاکا طیارہ تیجس فضائی مظاہرے کے دوران گر کر تباہ ہوگیا، جس کے نتیجے میں پائلٹ جاں بحق ہوگیا۔ حادثے کے فوراً بعد المکتوم انٹرنیشنل ایئرپورٹ کے اطراف گھنا دھواں پھیل گیا جس نے ماحول کو مزید سنسنی خیز بنا دیا۔
بھارتی فضائیہ نے واقعے کی تصدیق کرتے ہوئے کہا کہ سنگل سیٹر تیجس طیارہ دورانِ پرواز اچانک زمین سے ٹکرا گیا، اور پائلٹ جانبر نہ ہوسکا۔ بیان میں افسوس کا اظہار کرتے ہوئے کہا گیا کہ فضائیہ “اس المناک گھڑی میں پائلٹ کے اہلِ خانہ کے ساتھ کھڑی ہے”۔ حادثے کی وجوہات جاننے کے لیے باضابطہ انکوائری کا حکم دے دیا گیا ہے۔
واقعے کی ویڈیوز سوشل میڈیا پر تیزی سے وائرل ہوئیں، جن میں طیارے کو نیچے آتے ہوئے اور پھر حادثے کے بعد دھوئیں کے بادل اٹھتے دکھایا گیا۔ این ڈی ٹی وی کے مطابق حادثہ مقامی وقت کے مطابق دوپہر 2 بج کر 10 منٹ پر پیش آیا، جس کے فوراً بعد ایئرشو کے علاقے میں دھواں پھیل گیا۔
تیجس لڑاکا طیارہ ہندوستان ایرو ناٹکس لمیٹڈ (HAL) نے تیار کیا ہے، اور یہ بھارت کی اُس کوشش کا اہم حصہ ہے جس کے ذریعے وہ روسی اور پرانے جنگی طیاروں پر انحصار کم کرنا چاہتا ہے۔ رپورٹ کے مطابق، گزشتہ دو برس میں یہ تیجس کا دوسرا بڑا حادثہ ہے۔ اس سے قبل مارچ گزشتہ سال راجستھان میں ایک تیجس طیارہ گرا تھا، جو 2001 کی پہلی آزمائشی پرواز کے بعد طیارے کی تاریخ کا پہلا حادثہ تھا، تاہم اُس وقت پائلٹ محفوظ طور پر نکلنے میں کامیاب ہوگیا تھا۔
بھارتی فضائیہ نے کہا ہے کہ حادثے کی مکمل تحقیقات کے لیے کورٹ آف انکوائری تشکیل دی جا رہی ہے تاکہ اصل وجوہات سامنے لائی جا سکیں۔
