جنیوا میں وزیراعظم کی فوکل پرسن برائے انسدادِ پولیو، عائشہ رضا فاروق نے عالمی ادارۂ صحت (ڈبلیو ایچ او) کے ڈائریکٹر جنرل ڈاکٹر ٹیڈروس ادہانوم گیبریاسس سے اہم ملاقات کی۔ ملاقات کے دوران پاکستان میں پولیو کی موجودہ صورتحال اور اس کے خاتمے کے لیے جاری اقدامات پر تفصیلی تبادلۂ خیال کیا گیا۔
نیشنل ایمرجنسی آپریشن سینٹر (نیشنل ای او سی) کے مطابق، عائشہ رضا فاروق نے پولیو کے خاتمے کے لیے ڈبلیو ایچ او کی مسلسل معاونت اور تعاون پر ڈاکٹر ٹیڈروس کا شکریہ ادا کیا۔ انہوں نے پولیو کے خلاف حاصل شدہ کامیابیوں کو برقرار رکھنے کے لیے پولیو ایریڈیکیشن انیشی ایٹو (PEI) اور ایکسپینڈڈ پروگرام آن امیونائزیشن (EPI) کے درمیان ہم آہنگی مزید تیز کرنے کی ضرورت پر زور دیا۔
ملاقات میں پاکستان کی جانب سے 2026 تک ملک سے پولیو وائرس کی مکمل روک تھام کے ہدف کا اعادہ بھی کیا گیا۔ اس موقع پر ڈاکٹر ٹیڈروس نے پاکستان میں پولیو کے خاتمے کے لیے کیے جانے والے اقدامات کو سراہتے ہوئے عالمی ادارۂ صحت کی جانب سے مکمل تعاون اور مسلسل معاونت کی یقین دہانی کرائی۔
