شہر قائد میں مختلف اقسام کے بخار میں مبتلا مریضوں کی تعداد میں اضافہ دیکھنے میں آیا۔میڈیارپورٹ کے مطابق کراچی کے سول ہسپتال کے ایمرجنسی انچارج ڈاکٹرعرفان صدیقی نے بتایا کہ وائرل بخار میں مبتلا مریضوں کی تعداد میں15 سے 20 فیصداضافہ ہوا ہے۔
ڈاکٹرعرفان صدیقی نے کہا کہ سول ہسپتال میں یومیہ موسمی بخار، ملیریا اور ڈینگی کے 300 کیس رپورٹ ہورہے ہیں، جناح ہسپتال میں بھی بخار کے روز 100 سے زائد مریض آرہے ہیں۔
سول ہسپتال کے ایمرجنسی انچارج نے بیماری سے بچنے کے لیے احتیاطی تدابیر اپنانے کی ہدایت کرتے ہوئے کہا کہ شہری غیر معیاری غذا سے اجتناب کریں، ماسک پہننے اور ہاتھ دھونے کی عادت اپنائیں۔
انہوں نے کہا کہ گندگی اور آلودگی بھی بخار اور انفیکشن کی بڑی وجہ ہے، خاص طور پر متاثرہ شخص ڈاکٹر کے مشورے کے بغیر اینٹی بائیوٹک کا استعمال نہ کرے۔
