کراچی میں اتوار سے اب تک 11 بار زلزلے کے جھٹکے محسوس کیے جا چکے ہیں جس کے باعث شہریوں میں شدید خوف و ہراس پھیل گیا ہے۔
گزشتہ رات 12 بج کر 53 منٹ پر ایک اور زلزلے کے جھٹکے محسوس کیے گئے جن کی شدت 3.4 ریکارڈ کی گئی۔ لانڈھی سمیت مختلف علاقوں میں دیواروں پر دراڑیں پڑ گئیں اور لوگ خوفزدہ ہو کر گھروں سے باہر نکل آئے۔
اس سے قبل پیر کی رات 11 بج کر 16 منٹ پر بھی زلزلے کے جھٹکے آئے تھے جن کی شدت 2.4 تھی اور مرکز ملیر کے قریب 10 کلومیٹر دور تھا۔
زلزلہ پیما مرکز کے مطابق آئندہ دو دن تک مزید جھٹکے محسوس کیے جا سکتے ہیں۔
چیف میٹرو لوجسٹ امیر حیدر نے جیو نیوز سے گفتگو میں بتایا کہ یہ جھٹکے لانڈھی فالٹ ریجن سے آرہے ہیں جو کہ ایک متحرک فالٹ لائن ہے، تاہم اب تک یہاں بڑے زلزلے نہیں آئے۔ کراچی میں ایک اور فالٹ لائن تھانہ بولا خان کے قریب بھی ہے جبکہ کیرتھر کے قریب بھی زلزلے کی سرگرمیاں رپورٹ ہوتی رہتی ہیں۔ ان فالٹ لائنز کے معمول پر آنے میں چند روز لگ سکتے ہیں۔
