رپورٹ: شایان شرجیل
تاریخ: 27 جون 2025
کراچی:
شہر قائد میں مون سون کی پہلی بارش نے گرمی کا زور توڑ دیا اور موسم خوشگوار بنا دیا۔ جمعرات کی رات شروع ہونے والی بارش وقفے وقفے سے جمعہ کی شام تک جاری رہی، جس کے دوران گرج چمک اور ٹھنڈی ہواؤں نے ماحول مزید دلکش بنا دیا۔
شہر کے مختلف علاقوں میں کہیں ہلکی اور کہیں تیز بارش ہوئی۔ گلشنِ اقبال، ناظم آباد، کلفٹن، صدر، گلستانِ جوہر، ایف بی ایریا، ڈی ایچ اے اور دیگر علاقوں سے شہریوں نے بارش کی اطلاعات دیں۔ بارش کے بعد درجہ حرارت میں نمایاں کمی دیکھی گئی اور شہریوں نے طویل عرصے بعد خوشگوار موسم کا بھرپور لطف اٹھایا۔
تاہم، بعض نشیبی علاقوں میں پانی جمع ہونے کے باعث ٹریفک کی روانی متاثر ہوئی اور شہری انتظامیہ کی کارکردگی پر ایک بار پھر سوالات اٹھنے لگے۔
محکمہ موسمیات (پی ایم ڈی) کے مطابق، شہر میں داخل ہونے والی مون سون ہوائیں آئندہ چند دنوں میں مزید بارشوں کا سبب بن سکتی ہیں۔ محکمہ موسمیات کے ترجمان کا کہنا ہے کہ "مون سون کا پہلا باقاعدہ سلسلہ شروع ہو چکا ہے، اور ہفتہ بھر وقفے وقفے سے بارشیں متوقع ہیں۔”
مختلف علاقوں میں 26 جون کو ریکارڈ کی گئی بارش کی تفصیل درج ذیل ہے:
نارتھ کراچی: 20.5 ملی میٹر
میمار: 17.8 ملی میٹر
ماڈل کالونی: 13 ملی میٹر
گلشنِ رومی: 12 ملی میٹر
ڈی ایچ اے فیز 2 ایکسٹینشن: 11 ملی میٹر
سعادی ٹاؤن: 11 ملی میٹر
کلفٹن: 10 ملی میٹر
گلستانِ جوہر: 9 ملی میٹر
ایف بی ایریا بلاک 16: 6 ملی میٹر
اسکیم 33: 5 ملی میٹر
بحریہ ٹاؤن: 5 ملی میٹر
ایف بی ایریا بلاک 14: 4 ملی میٹر
لیاری: 2.5 ملی میٹر
شہریوں کو مشورہ دیا گیا ہے کہ وہ موسمی اپ ڈیٹس پر نظر رکھیں اور غیر ضروری سفر سے گریز کریں، بالخصوص ان علاقوں میں جہاں پانی کی نکاسی کا مناسب انتظام موجود نہیں ہے۔
