ایک طویل تحقیق میں انکشاف ہوا ہے کہ وٹامن ڈی کی روزانہ خوراک لینے سے نہ صرف ہائی کولیسٹرول میں کمی آتی ہے بلکہ یہ ہائی بلڈ پریشر اور ذیابیطس کے خطرات کو بھی کم کر سکتی ہے۔
تحقیق کے مطابق وٹامن ڈی کا استعمال جسم میں انسولین کی پیداوار کو بھی بہتر بناتا ہے۔
طبی جریدے میں شائع رپورٹ کے مطابق امریکی اور چینی ماہرین نے دنیا بھر میں کی جانے والی تحقیقات کا جائزہ لینے کے بعد نتیجہ اخذ کیا کہ وٹامن ڈی کی روزانہ خوراکیں متعدد طبی مسائل سے بچاؤ میں مددگار ثابت ہوتی ہیں۔
ماہرین نے دنیا کے مختلف ممالک میں کی جانے والی 99 تحقیقات کا تجزیہ کیا جن میں تقریباً 18 ہزار افراد شامل تھے۔ نتائج سے معلوم ہوا کہ اگرچہ وٹامن ڈی نوجوانوں اور درمیانی عمر کے افراد کے لیے بھی مفید ہے، لیکن یہ بزرگ افراد کے لیے زیادہ مؤثر ثابت ہوتی ہے۔
ماہرین کا کہنا ہے کہ بڑھتی عمر کے ساتھ جسم میں وٹامن ڈی کی مقدار کم ہونے لگتی ہے، اس لیے عمر کے ساتھ اس کی روزانہ خوراک لینا ایک بہترین حکمتِ عملی ہے۔
تحقیق کے مطابق 50 سال کی عمر کے بعد وٹامن ڈی کے روزانہ کیپسول لینے سے زیادہ فائدہ حاصل کیا جا سکتا ہے، کیونکہ یہ نہ صرف کولیسٹرول اور بلڈ پریشر کو کم کرتا ہے بلکہ ذیابیطس کے امکانات کو بھی گھٹاتا ہے۔
ماہرین نے یہ بھی مشورہ دیا ہے کہ اگر وٹامن ڈی سے بھرپور قدرتی غذائیں استعمال کی جائیں تو یہ زیادہ بہتر ہے، تاہم ایسی غذاؤں کے ساتھ وٹامن ڈی کے کیپسول لینا بھی فائدہ مند ثابت ہو سکتا ہے۔
