اکتوبر 27، 2025
ویب ڈیسک
حرمین شریفین کے امور کی دیکھ بھال کرنے والے ادارے کے جنرل انتطارات نے رپورٹ جاری کی ہے کہ جمادی الاول 1447 ہجری کے دوران عمرہ کرنے والوں کی اوسط تعداد 14 لاکھ سے تجاوز کر گئی۔ رپورٹ کے مطابق زائرین نے اوسطاً 116 منٹ میں عمرہ مکمل کیا۔
تفصیلات کے مطابق 92 فیصد زائرین نے طواف مسجد الحرام کے مطاف کے علاقے میں انجام دیا، جبکہ اوسطاً 42 منٹ میں طواف مکمل ہوا۔ صفا اور مروہ کے درمیان سعی کے لیے اوسط دورانیہ 46 منٹ ریکارڈ کیا گیا۔
انتظامیہ کا کہنا ہے کہ بہتر منصوبہ بندی اور جدید انتظامی اقدامات کی بدولت زائرین کی آمدورفت میں روانی پیدا ہوئی ہے اور بھیڑ میں نمایاں کمی آئی ہے۔
رپورٹ میں مزید بتایا گیا کہ ان اقدامات کے باعث عمرہ زائرین کے لیے روحانی تجربہ پہلے سے زیادہ پرسکون اور آسان ہو گیا ہے، جس سے مجموعی طور پر انتظامات کی کامیابی کا اندازہ ہوتا ہے۔
