نومبر 11، 2025
ویب ڈیسک
محکمہ موسمیات برطانیہ (Met Office) نے ملک کے مختلف حصوں کے لیے ییلو ویدر وارننگز جاری کی ہیں، کیونکہ منگل کے روز ملک بھر میں شدید بارشوں اور تیز ہواؤں کا سلسلہ متوقع ہے۔
یہ وارننگز جنوب مغربی اسکاٹ لینڈ، جنوبی ویلز، جنوب مغربی انگلینڈ اور شمالی آئرلینڈ کے علاقوں میں نافذ ہیں، جہاں 20 سے 40 ملی میٹر تک بارش ہونے کا امکان ہے، جبکہ کچھ مقامات پر یہ شرح 60 ملی میٹر تک پہنچ سکتی ہے۔ محکمہ موسمیات کے مطابق جنوبی ویلز میں 30 سے 50 ملی میٹر تک اور شمالی آئرلینڈ میں 20 سے 30 ملی میٹر تک بارش ہو سکتی ہے۔
محکمہ موسمیات نے خبردار کیا ہے کہ بارشوں کے باعث ٹریفک میں تاخیر، سڑکوں پر پھسلن، اور مقامی سطح پر سیلاب کے خدشات موجود ہیں۔ سمندری کناروں اور کھلے مقامات پر ہوائیں تیز رہیں گی جن کی رفتار بعض علاقوں میں گیل فورس تک پہنچ سکتی ہے۔
بدھ کے روز انگلینڈ، ویلز اور شمالی اسکاٹ لینڈ میں مزید بارشوں کا امکان ہے، جبکہ شمالی حصوں میں درجہ حرارت میں کمی اور رات کے وقت کہر اور ہلکی برفباری متوقع ہے۔ جمعرات سے ہفتے تک شمالی علاقوں میں سردی بڑھے گی اور صبح کے وقت کہر اور فراسٹ پڑنے کا امکان ہے
