سوشل میڈیا پلیٹ فارم ایکس نے اپنے موجودہ ریونیو شیئرنگ پروگرام کے لیے نئی درخواستیں قبول کرنا بند کردی ہیں اور اسے 7 ستمبر کے بعد مکمل طور پر ختم کرنے کا اعلان کیا ہے۔
ایکس نے پرانے پروگرام کے متبادل کے طور پر Original Content Rewards Program متعارف کرایا ہے، جس کے تحت ایسے تخلیق کاروں کو مالی انعام دیا جائے گا جو پلیٹ فارم پر اپنی اصل سوچ، مہارت، رپورٹنگ، تخلیقی صلاحیت اور تجزیہ پیش کرتے ہیں۔
نئے پروگرام کے تحت تخلیق کار اپنے اصل مواد کو ملنے والے اہل امپریشنز کی تعداد کی بنیاد پر رقم کما سکیں گے۔
ایکس کے مطابق اصل مواد میں صارف کی اپنی تحریر یا رپورٹنگ، خود بنائی گئی تصاویر یا ویڈیوز، میمز اور اپنی تیار کردہ illustrations شامل ہیں۔
صارفین دوسروں کی پوسٹس سے بھی آمدنی حاصل کرسکتے ہیں، تاہم اس کے لیے انہیں بامعنی تبصرہ یا تجزیہ شامل کرنا ہوگا یا موجودہ تصاویر اور ویڈیوز میں تخلیقی انداز میں نمایاں ترمیم کرنا ہوگی۔ صرف کسی دوسرے شخص کے مواد پر ایسا کیپشن یا ٹیکسٹ لگانا جو محض اس میں ہونے والی چیز کو بیان کرے، اصل مواد تصور نہیں ہوگا۔
نئے پروگرام کے لیے اہل ہونے کی خاطر صارف کی عمر کم از کم 18 سال ہونا اور ایسے ملک میں رہائش پذیر ہونا ضروری ہے جہاں یہ پروگرام دستیاب ہو۔
صارف کے پاس Premium، Premium+ یا Premium Business سبسکرپشن بھی ہونی چاہیے، جبکہ کم از کم 500 تصدیق شدہ فالوورز اور گزشتہ 90 دنوں میں تصدیق شدہ صارفین کی جانب سے کم از کم 500,000 ہوم ٹائم لائن ویوز بھی درکار ہوں گے۔
پروگرام کے تحت صرف Premium صارفین سے حاصل ہونے والے اہل امپریشنز شمار کیے جائیں گے۔ پروگرام میں شامل ہونے کے بعد بھی تخلیق کاروں کو ادائیگیاں جاری رکھنے کے لیے اہلیت کی شرائط پوری کرنا ہوں گی۔
ایکس کے موجودہ ریونیو شیئرنگ پروگرام میں شامل تخلیق کار 8 ستمبر سے نئے پروگرام کے لیے دوبارہ درخواست دے سکیں گے، جبکہ وہ صارفین جو پرانے پروگرام میں شامل نہیں تھے، اہلیت پوری کرنے کی صورت میں نئے Original Content Rewards Program کے لیے درخواست دے سکیں گے۔
ایکس نے مارچ میں اپنے ریونیو شیئرنگ پروگرام میں تبدیلی کرتے ہوئے صارفین کے آبائی یا مقامی علاقوں سے حاصل ہونے والی انگیجمنٹ کو زیادہ اہمیت دی تھی۔
یہ تبدیلی بظاہر ان اکاؤنٹس کی حوصلہ شکنی کے لیے کی گئی تھی جو خود کو امریکی ظاہر کرتے ہوئے امریکا سے متعلق مواد پوسٹ کررہے تھے، حالانکہ ان کے آپریٹرز ممکنہ طور پر امریکا سے باہر موجود تھے۔
تاہم یہ واضح نہیں کہ ایکس کے نئے Original Content Rewards Program میں بھی علاقائی انگیجمنٹ سے متعلق یہی شرط برقرار رہے گی یا نہیں۔
